Oranan di konsulta den barionan ku kolaboradónan di entidat públiko Boneiru i gobièrnu hulandes ta bai tene huntu entrante 27 di yüni, ta bai trese e lokètnan mas serka di e siudadano. E eksperimento ta kuminsá na Rincon.
Ta trata di lokètnan di e sekshon di Asistensia Sosial i Intermediashon pa empleo (MOA) di OLB i e sekshon di Ònderstant di e Unidat di Asuntunan Sosial i di Empleo (SZW) di RCN. MOA i SZW kier traha huntu pa alkansá tur habitante di Boneiru i ofresé nan e sosten ku nan tin mester pa por entregá un petishon.
Intenshon di e oranan di konsulta ta pa hasi e distansia pa siudadanonan físikamente kòrtiku i baha e drèmpel pa haña ayudo mas. E ta evitá tambe ku siudadanonan mester akudí na diferente lokèt.
Durante e ora di konsulta MOA ta atendé petishonnan pa sosten sosial, por ehèmpel den forma di awa, koriente, artíkulonan pa skol i akohida pa mucha. Ademas MOA por yuda riba tereno di mobilisashon pa empleo. Asina personanan por inskribí komo buskadó di trabou i ta intermediá direktamente pa haña un vakatura disponibel te asina leu ku esei ta posibel.
SZW por atendé pregunta-, petishon-, i kambionan pa ònderstant general i speshal (esaki ta pa personanan ku un entrada bou di e suèldu mínimo pa lei di $820 pa luna). Pero tambe esnan ku tin derecho riba penshun por akudí na e ora di konsulta pa hasi petishon- i kambionan relashoná ku pago di AOV.
OLB i e Unidat SZW di RCN huntu ta responsabel pa duna sosten na siudadanonan vulnerabel. E ora di konsulta èkstra akí ta mustra siudadanonan di Rincon kon por hasi uso di e fasilidatnan ku (legalmente) ta eksistí.
A base di e resultadonan di e eksperimento akí MOA i SZW lo bai deliberá si tin posibilidat pa introdusí oranan di konsulta konhunto den otro barionan tambe. Naturalmente tur siudadano por sigui hasi uso normal di e orarionan di konsulta regular na Centrumgebied.
Diputado Nina den Heyer i Representante di Reino Gilbert Isabella ta aploudí e kolaborashon importante akí riba nivel lokal. Nan lo ta presente djamars, 27 di yüni, di 9or pa 10or di mainta pa hasi apertura di e ora di konsulta ku un toke festivo. Tur interesado ta bonbiní pa ta presente durante e mainta akí na Ofisina ouksiliar di gobièrnu den Kaya Miguel Pourier.