Si bo tin molèster di spit abou di data òf ku yamada ku ta kai afó, probablemente bo di tin keho riba e servisio di bo provèdor di telefonia selular. Pero no ta tur biaha e operador por hasi algu na esaki. Den e boletin aki Agentschap Telecom (Radio Agency Netherlands) ta duna splikashon dikon esaki ta asina.
Sistemanan ku ta traha ku señal di radio ta hasi uso di fenómeno sientífiko pa propagá nan mes i por pone ku señal nan di radio por komportá nan mes di forma nan straño tambe. Sirkunstansia di wer, edifisio, tereno y radiashon di solo tur ta influensiá e manera ku e señal di radio ta transmití su mes.
Na momentu ku wer ta hopi bunita e retnan móbil na Boneiru, Kòrsou y Aruba por haña nan konfrontá ku molèster pa motibu ku señal di radio prosedente di Venezuela ta interferí ku e señal di radio riba nos islanan. Na e kosta di Venezuela tin diferente mast di selular ku ta situá haltu den e serunan. Riba su mes ya esei ta mal notisia pa e paisnan bisiña. I ora seguidamente sierto kombinashonnan di, temperatura, preshon di aire y humedat presentá, señalnan di radio por yega muchu mas leu ku ta sosodé bou di kondishonnan normal.
Sientifikónan ta yama e fenómeno aki ‘ducting’. Na lugá di muri despues di un sierto distansia e señalnan di radio ta bòns entre diferente kapa di aire òf entre kapa di aire y laman dor di kua e energia di e señal ta keda konsentrá y no ta pèrdè forsa. Tin biaha e senalnan por yega sinku bes su distansia normal. E distansha di mas o ménos 100 kilometer entre Venezuela y Boneiru fásilmente ta wòrdu pasá e or’ei.
Komo konsekuensia di esaki e empresanan móbil riba e islanan ABC ta kontra difikultat pa mantené e kalidat di e konekshonnan na un nivel aseptabel.
Agentschap Telecom den koperashon estrecho ku Bureau Telecommucatie & Post di Kòrsou y e instansia di supervishon di telekomunikashon Venezolano Conatel, ta hasiendo esfuersonan pa logra ku e empresanan móbil na Venezuela hasi ahuste na nan retnan. Pero en bista di e situashon polítiko y ekonómiko na Venezuela e negoshashon nan aki ta durando mas largu ku a spera.
Riba nivel lokal Agentschap Telecom ta investigando e posibilidat pa e empresanan hasi uso di otro frekuensianan kaminda chèns pa interferensia por ta ménos. Esaki sinembargo ta tuma tempu. Y tanten ku e solushon nan aki no ta na nan lugá e situashon aki ta pidi bo pasenshi y komprendementu.
Si bo ta deseá di sa si tin kondishon pa ducting presentá, bo por hasi uso di e siguiente wèpsait: www.dxinfocentre.com/tropo_car.html
Agentschap Telecom ta e supervisor di telekomunikashon pa Bonaire, Sint Eustatius y Saba.