Na: Presidente I Miembronan di Tweede Kamer di Hulanda, Minister di Relashonan di Reino
Gezaghebber di Bonaire, Sr Rijna, Miembronan di Konseho Insular di Bonaire, Gobiernu di Boneiru
Bonaire, 27 Mart 2017
Apresiabel Koleganan,
Pa medio di esaki nos ta referi na nos ultimo karta di obheshon kontra e elekshon di Parlamento Hulandes ku a wordu organisa riba nos islanan di Bonaire I Sint Eustatius, kaminda ku e pueblonan nunka a skohe pa e Parlamentu Hulandes komo nan representantenan I tampoko komo leglisladornan(pa traha leynan). E elekshon Hulandes riba nos islanan por wordu konsidera komo un referendum ku mal intenshon, un trampa demokratiko illegal kamufla, un intento pa legalisa e aktual struktura konstitushonal Entidat Publiko ku ta illegal, kual a keda rechasa den referendumnan respektivamente pa e pueblo Boneriano na 2015 I e pueblo di Sint Eustatius na 2014. Ambos resultadonan a keda ratifika pa e representantenan demokratikamente elegi di e pueblonan di Bonaire I Statia komo desishonan demokratiko legal di e pueblonan.
Boso intenshon pa usa partisipashon boluntario di nos suidadanonan den boso elekshon Hulandes komo konsenso pa legitimisa boso anekshon illegal I representashon illegal di nos pueblonan dor di boso parlamentu Hulandes I aun mas boso intenshon sin presedente, no-demokratiko I inhumano di boso minister Plasterk pa skedjel pa e gobiernu nobo kaba finalisa e ankramentu di Bonaire I Sint Eustatius pa eternidat den boso konstitushon, a wordu massalmente rechasa pa nos pueblonan riba 15 Mart 2017. E gobiernu Hulandes deliberadamente a sali pa manipula e pueblo pa medio di un kampanja agresivo di propaganda pa bai vota. Esaki tabata enkabesa pa e agensia lokal di administrashon di gobiernu Hulandes ku ta RCN I politikonan Hulandes ku a kampanja riba e isla. A pesar di nan esfuerzo I esfuerzonan di nan kolaboradornan riba Bonaire; e sektor komersial (donjonan di trabao menasando trahadornan) , ex I aktual lidernan politiko di e partidonan grandi (MPB, UPB I parti di DP), I media, e partisipashon elektoral tabata solamente 22%, ku tin ku wordu akredita prinsipalmente na e maneho abierto di imigrashon pa Hulandesnan Oropeo invadiendo I repopulando Bonaire desde 10-10-10. Un trampa demokratiko: 12 mil votadonan lokal na Bonaire ta eherse kasi nada pa influensia kompara ku e 13 miyon votadornan Oropeano na Hulanda pa e 150 asientonan. Pa un asiento mester aproximadamente 70 mil voto. Bonaire un nashon ku tin su mes kultura I tradishonan, idioma, norma I balor, I su mes identidat I e derecho irrevokabel di outo-determinashon, ku menos di un per mil porsentahe di chens pa representashon den parlamentu Hulandes pa defende I mantene e derechonan aki. Pa komparashon I pone e resultado den perspektiva pa komprende I respeta kiko a sosede: 82% di Hulandesnan Oropeo na Hulanda a bai vota pa elegi nan representantenan I aki 77% di e esnan ku derecho di voto na Bonaire a rechasa e intento legal inhustu aki. Esaki lo a nifika ku 10 miyon Hulandes Oropeo no a bai vota I a protesta kontra di e anekshon I okupashon illegal I dominio estranhero kolonial.
Nos ta sumamente preokupa ku e pueblonan di Bonaire I Sint Eustatius presentemente ta wordu goberna kontra nan deseo, I kontrario di normanan demokratiko, den un status di inigualdat politiko I ekonomiko. Nos ta reafirma ku e doktrina legal internashonal riba outo-determinashon I dekolonisashon ta kontinuamente aplikabel, meskos e provishonan di Kapitulo XI di e “Tratado Konserniendo Teritorionan Sin Propio Gobernashon” pa ambos teritorio di Bonaire I Sint Eustatius. Nos lo kontinua buska sosten di e komunidat internashonal I di Nashonan Uni I por lo tanto I pa e motibu aki, I ku ta na e pueblo e derechonan aki ta pertenese I no ta wordu respeta ku respekto na nos derechonan demokratiko I humano, nos no tin otro opshon ku ta disobendensia sivil I kai bek riba nos leynan natural ku ta irrevokabel pa asina por segura nos eksistensia komo pueblonan di Bonaire I Statia te na e momento ku e gobiernu Hulandes I nan kolaboradornan lokal respeta, proteha I kumpli ku nos derechonan irrevokabel kual nos a hereda I atkeri.
James Finies, Nos Kier Boneiru Bek
c.c. Komishon di Dekolonisashon di Nashonan Uni, COPPPAL, Gobiernu I Konseho Insular di Sint Eustatius, Brighter Path Foundation