E Direktor i Sekretario General di Konseho Sosial Ekonómiko (SER) a ser invitá dor di parlamento pa un reunión di komishon sentral djaweps 9 di yüli próksimo, pa diskutí i interkambiá riba e tema ‘Futuro di Trabou’. E reunión di Komishon Sentral a ser solisitá pa frakshon di MAN den parlamento ku kier skucha punto di bista di SER riba e kambionan fundamental den mundu di trabou ku ta tumando lugá mundialmente i ku tambe tin su konsekuensianan pa Kòrsou.
Na 2018 i 2019, den e periodo previo na selebrashon di e sentenario di e Organisashon Internashonal di Trabou (OIT), ku tabata tin komo tema sentral ‘Futuro di trabou’, SER a sera un aliansa stratégiko ku Ministerio di Desaroyo Sosial, Labor i Bienestar (SOAW) na nivel tékniko i durante diferente seshon di debate, reunionan temátiko i konferensianan a elaborá riba e impakto ku, entre otro, inteligensia artifisial, robotisashon, big data, kambionan klimátiko i faktornan demográfiko tin riba merkadonan laboral, en partikular merkado laboral di Kòrsou.
E medidanan en konekshon ku e vírus di Corona (COVID-19) tambe tin un gran impakto riba mundu di trabou. Esakinan i otro temanan relashoná lo ser diskutí mas a fondo ku Parlamento djaweps próksimo. Minister Hensly Koeiman di SOAW tambe lo asistí na e debate di komishon sentral di Parlamento.
- Monday, May 20, 2024
