E siman aki e Tribunal Médiko Disiplinario Hulanda Karibense (Medisch Tuchtcollege Caribisch Nederland – MTCN) a kompletá tratamentu di e promé kasonan. Ta trata aki di tres keho disiplinario kontra dos médiko i un djentista. A duna rason na un di e kehonan parsialmente i a emití un atvertensia. A deklará e otro dos kehonan infundá.
Un kolegio ku ta eksistí di un hurista i dos médiko(dental) ta evaluá kada keho ku drenta serka Tribunal Médiko Disiplinario. Minister di Salubridat Públiko, Bienestar i Deporte ta nombra e miembronan. E kolegio ta evaluá si e médiko(dental) a traha di akuerdo ku e standardnan di un médiko òf djentista ku ta aktua razonabel. Aki ta sali for di e punto di bista ku e dunadó di kuido ta funshoná riba mesun nivel ku Hulanda Oropeo. Naturalmente ta tene kuenta ku e situashon spesífiko bou di kua ta práktika medisina riba kada isla.
Ora ta trata un keho, tantu e demandante komo e akusado ta haña oportunidat pa trese nan punto di bista kompletamente dilanti. E Tribunal Disiplinario ta evaluá si e tema en kuestion ‘no a bai bon’ òf ‘no a hasí esaki bon’. Si un dunadó di kuido a aktua robes ta hustifiká e keho. Den e kaso ei por emití un atvertensia, represhon, suspenshon òf prohibishon.
E tarea di e Tribunal Disiplinario ta pa supervisá i promové un bon kuido di salú. E kolegio no por otorgá daño di perhuisio ni determiná e responsabilidat di un dunadó di kuido. Esaki ta sosodé via di un hurisprudensia normal.