Autoriteit Consument en Markt (ACM) ta stipulá e tarifanan pa konekshon i rekonekshon di elektrisidat i awa di bebe na Boneiru entrante promé di yüli 2017. E tarifanan di konekshon ta e tarifanan ku konsumidónan mester paga pa instalá un konekshon nobo. E tarifanan di rekonekshon ta e montante ku konsumidónan mester paga si nan kier ser konektá di nobo.
Riba promé di yüli 2016 e Lei elektrisidat i awa di bebe BES a drenta na vigor. ACM tin e tarea pa stipulá tarifanan pa elektrisidat i awa di bebe. Ta trata di kuater tipo di tarifa: e tarifa pa konekshon, e tarifa pa rekonekshon, e tarifa fiho i tarifa variabel pa uso. ACM ta stipulá entrante promé di yüli 2017 dos di e kuater tarifanan aki: e tarifa di konekshon i e tarifa di rekonekshon. AMC ainda no ta stipulá e dos otronan, e tarifa fiho i variabel pa uso.
Altura di e tarifa di konekshon
Altura di e tarifa di konekshon ta dependé di grandura di e kapasidat di konekshon. Pa tur kapasidat di konekshon te ku 10 kiloVoltAmpère (kVA) e tarifa di konekshon ta USD 2.337,13. Pa awa di bebe e tarifa di konekshon ta USD 1.623,03 pa e kapasidat di konekshon mas komun, esta un mei dùim (esaki ta e midí pa grandura di e konekshon). Pa kapasidatnan mas grandi ACM no ta stipulá tarifa di konekshon, pero WEB lo fakturá e kliente e gastunan. ACM ta vigilá despues e oferta- i fakturanan ku WEB ta manda, pa pèrkurá ku e gastunan ku WEB ta fakturá ta transparente i hustu. Si un konekshon ta keda mas leu ku 25 meter for di e ret, e ora ei WEB mag kobra USD 11,24 pa meter èkstra pa elektrisidat i pa awa di bebe USD 53,05.
Altura di e tarifa di rekonekshon
E tarifa pa rekonekshon ta igual pa tur konsumidó i ta USD 40 pa tantu awa di bebe komo pa elektrisidat. Si deskonektá un persona (pa mal pago, òf por ehèmpel riba propio petishon, pasobra e kas lo no ta habitá pa un periode), e ora ei bo ta paga pues USD 40 na WEB pa ser konektá di nobo. Si bo pidi pa rekonekshon pa ámbos fasilidat esei ta kosta pues e ora ei USD 80 (2x USD 40).
No a stipulá e tarifa fiho i variabel pa uso ainda
E tarifa variabel pa uso ta e tarifa ku kada konsumidó ta paga pa e kantidat di koriente òf awa ku el a usa den un luna. Ta ekspresá e tarifa ei den un montante pa kilowatt pa ora pa elektrisidat i un montante pa meter kúbiko pa awa di bebe. E tarifa fiho pa uso ta e montante ku kada konsumidó ta paga pa luna pa e ret, sin importá e kantidat di awa òf koriente ku e usa. E tarifa fiho di uso ta dependé di e kapasidat di konekshon di un bibienda/kompania.
Pa elektrisidat ACM ainda no ta stipulá e tarifa fiho i variabel di uso, pasobra e kapasidat di
konekshon di tur konekshonnan independiente na Boneiru (ainda) no ta konosí serka WEB. ACM mester di e informashon akí pa por stipulá e tarifa fiho di uso. WEB na e momentunan akí ta inventarisando e kapasidatnan di konekshon akí na moda ku ACM por stipulá e tarifa fiho e variabel pa uso entrante promé di yanüari 2018.
Pa awa di bebe AMC ainda no ta stipulá e tarifa fiho i variabel di uso, pasobra ministerio di Infrastruktura i Medioambiente i WEB ta den deliberashon tokante e impakto ku e struktura di tarifa nobo tin riba e diferente gruponan di konsumidó. A base di e resultadonan di esaki ministerio ta disidí tokante posibel supsidio adishonal.