Efektonan sosioekonómiko di COVID-19 den konteksto di e ophetivonan pa desaroyo sostenibel

WILLEMSTAD, 14 di sèptèmber 2020 – Bou di e título “Efektonan sosioekonómiko di COVID-19 den konteksto di e ophetivonan pa desaroyo sostenibel”, e asosiashon mundial di Konsehonan Ekonómiko i Sosial i Institutonan Similar (AICESIS) ta organisá, djárason dia 16 di sèptèmber próksimo un seminario internashonal riba wèp (webinar). Durante e webinar aki, den kua lo profundisá riba e efektonan sosioekonómiko di e krísis di COVID-19 den kuadro di e ophetivonan pa desaroyo sostenibel (SDG’s), interkambio di konosementu i eksperensianan lo ta sentral.
Aunke e konteksto mundial a kambia radikalmente komo resultado di e pandemia di COVID-19, e ophetivonan di desaroyo sostenibel di Nashonnan Uní, e Akuerdo di Paris riba kambio klimátiko i rèspèt pa derechonan humano ta mas relevante ku nunka. E regionnan afiliá na AICESIS lo elaborá riba e temanan aki durante e webinar i nan lo indiká kon nan ta purba di respondé na e yamamentu di Nashonnan Uní pa “Rekonstruí Mihó”, spesialmente na un momentu di krísis kaminda kooperashon internashonal ta bou di preshon.
Durante e webinar, Konseho Sosial Ekonómiko (SER) di Kòrsou lo hiba palabra na nòmber di e region di Latino Amérika i di Karibe. SER lo indiká ku e esfuersonan aktual lo mester kondusí na ekonomianan i sosiedatnan inklusivo i sostenibel ku por hasi nan mas resistente pa futuro pandemianan, krísisnan ekonómiko, kambio klimátiko i otro menasanan i desafionan global.
E webinar ta wòrdu organisá den estrecho kolaborashon ku Konseho Ekonómiko i Sosial di Nashonnan Uní (ECOSOC), e Asosiashon di Konsehonan Ekonómiko i Sosial di Afrika (UCESA) i e Asosiashon di Órganonan Konsultivo Ekonómiko i Sosial i Institushonnan Similar di Francofonía (UCESIF).

Pa mas informashon por bishita e página wèp di SER: www.ser.cw

scroll to top