Djaluna último, 30 di sèptèmber 2019, International Organization of Securities Commissions (IOSCO) a lansa e kampaña mundial di World Investor Week 2019 (WIW). E kampaña WIW a wòrdu instituí pa konsientisá riba importansha di edukashon pa invershonistanan i inkrementá protekshon pa medio di varios inisiativanan di parti di reguladónan riba e temanan aki. Centrale Bank van Curaçao en Sint Maarten (CBCS) ta sostené e kampaña aki pa medio di algun inisiativa propio, manera entre otro un webinar titulá ‘A Sneak Peek Into Financial Education Matters: Crypto-Assets’, djabièrnè awor 4 di òktober 2019 pa 10AM. Meta di e webinar ta pa eduká públiko riba e konsepto di crypto-assets i e riesgonan konserní. Crypto-assets dia pa dia ta bira mas popular. Sinembargo konsumidónan mester realisá ku ta importante pa sa e riesgonan ku ta mará na esaki promé ku nan invertí. Mas aún pa e echo ku ofresedónan di crypto-assets no ta regulá. Volatilidat haltu, falta di regulashon (adekuá), vulnerabilidat den e area di cybersecurity, maluso dor di kriminalnan, práktikanan froudulento i falta di transparensha ta hasi ku e tipo di invershonan aki no ta apropiá pa invershonistanan privá òf otro invershonistanan fuera di esnan profeshonal, akreditá òf avansá. E webinar ta konsistí di presentashonan di parti di oradónan renombrá internashonal Owen Donley (United States Securities Exchange Commission), Oz Eleonora (Zinica Group / Dutch Caribbean Securities Exchange) i Errol Cova (CBCS). Shekinah Dare (CBCS) lo ta e moderadó.
Un i tur ku ta interesá den e tópiko aki por partisipá grátis na e webinar. Por registrá via e lenk riba e wèpsait di CBCS.
Alabes CBCS ta introdusí e siguiente edishon di Famia Florin. Den e kapítulo aki ta alertá riba e wega ilegal di piramit. E klep nobo ta visibel riba nos wèpsait i medionan sosial.
CBCS, komo miembro di Caribbean Working Group di IFIE (International Forum for Investor Education), huntu ku otro miembronan, tambe a inisiá e Caribbean Fintech Pledge. E inisiativa aki ta pa pidi hende pa primintí ku nan lo tuma desishonan informá i konsiderá ora disidí di invertí den crypto-assets. CBCS ta invitá un i tur bishitá su wèpsait pa kumpli ku e promesa den kuadro di e inisiativa di Caribbean Fintech Pledge.
Informashon tokante di tur e inisiativanan ta optenibel na https://www.centralbank.cw/eventcalendar/events/world-investor-week-2019.