Djaweps 30 di ougùstùs RCN den estrecho kolaborashon ku OLB a organisá Dia di Prensa pa di dos biaha. Entretantu esaki a bira un bon tradishon pa demostrá apresio pa prensa i pa fortalesé e relashon ku prensa.
E tema di e aña akí tabata ’E ròl di prensa i gobièrnu durante di un krísis’. Un tema aktual pasó orkan Irma ainda ta fresku den nos memoria. Durante Irma por a mira kon importante komunikashon, komprenshon i kolaborashon entre prensa i gobièrnu ta. Ta importante pa prensa i gobièrnu ta riba un liña pa evitá komunikashon inkorekto òf disturbio di informashon durante un desaster òf krísis.
Representante di Reino suplente, señor Jan Helmond, a inougurá e atardi, siguí pa un diskurso di Gezaghèber di Boneiru señor Edison Rijna. Durante e diskurso señor Rijna, via di un video di animashon, a demostrá e app ‘Disasterprep Bonaire’ (https://we.tl/t-KvYZIv0VkY ). Un app di desaster i krísis di OLB. Seguidamente tabatin algun presentashon pa e 42 partisipantenan inkluyendo prensa i ekspertonan di komunikashon di gobièrnunan i di instansianan semi gubernamental. Den un ‘workshop’ a pidi partisipantenan pa averiguá kua ta e problemanan ku nan por eksperensiá durante un desaster òf krísis. A sigui un diskushon animá entre e diferente gruponan.
A konkluí ku gobièrnunan mester realisá ku, den tempu aktual di medianan sosial, informashon ta sali hopi lihé. Gobièrnunan mester antisipá riba esaki i mester tin liñanan mas kòrtiku den prosedimentunan, pa asina por duna informashon kordiná i konfiabel mas lihé posibel.
Prensa a indiká ku rapides ta importante pa nan. Pero ku si gobièrnu komuniká transparente i abierto ku nan, ta balorá presishon di informashon mas ku rapides. E ophetivo di e atardi akí tabata pa krea mas komprenshon pa otro i pa stimulá mihó kordinashon entre prensa i gobièrnunan i asina informá pueblo adekuadamente. Ta kompartí e konklushon- i akuerdonan será ku e partisipantenan di e atardi. A sera e evento ku un beter durante un biahe riba boto.