WILLEMSTAD / PHILIPSBURG – Entrante 5 di mei 2017, lo inkluí un porsentahe anual máksimo di krédito (APR), den Disposishonnan tokante di Divulgashon di Informashon di Preis di Krédito pa Konsumidó (“Provishonnan di APR”), kual a drenta na vigor dia 5 di mei 2015. E disposishonnan aki ta kreá pa protehá konsumidónan dunando nan informashon adekuá pa por tuma un mihó desishon ora nan ta pidi pa hasi un fiansa i pa por tin mas transparensia den merkado finansiero lokal.
E desaroyo kaminda esnan ku ta duna un fiansa ta kobrando kada biaha mas i mas gastu i desaroyo di regulashonnan internashonal, a pone ku a bini modifikashonnan den provishonnan di APR na 2015. APR1 ta konsistí di e gastu total di e fiansa na konsumidó, ekspresá den un porsentahe anual di e krédito total. E ta reflehá tur gastu di krédito ku e konsumidó tin durante di durashon di e kontrakt di fiansa. Banko Sentral a hasi un investigashon ekstenso pa komprondé mihó e alkanse i riesgonan ku tin den e sektor di fiansanan mikro. E resultado ta mustra ku den sektor di fiansa mikro tin un APR promedio di 437% i un APR máksimo ku ta mas ku 3.500%. E APR-nan haltu aki ta kontra di normanan internashonal di komportashon i ta reflehá tasanan di interes for di proporshon i eksagerá ku ta stroba e konsumidó, ta krea debe rápidamente den kasnan di famia i ta okashoná dependensia finansiero entre e dos partidonan. APR haltu ta rason grandi pa preokupashon, ya ku nan por resultá den sírkulonan visioso. Pa un individuo, e proseso aki por resultá den un futuro finansiero yená ku strès, miéntras ku pa un pais strobamentu sistemátiko den e proseso di krédito por krea problema ku ta wanta kresementu ekonómiko real. Banda di resultado di e investigashon riba APR, a basa e máksimo APR tambe riba entre otro un veredikto di un máksimo di 18% di APR dor di Korte Komun di Hustisia di Antia i di Aruba na 1999, ku a dikta ku tur porsentahe riba 18% ta kontra di moral. Tambe a tene kuenta ku Harmonisashon di leinan den Reino Ulandes. E aktual APR máksimo den islanan BES (Bonaire, Saba i Sint Eustatius) i na Ulanda ta fihá riba respektivamente 23% i
1 Metodologia pa kalkulá ARP ta mes un kos ku e Guia di Krédito pa Konsumidó di Komishon Europeo i di e kalkulo di APR di Outoridat Ulandes pa Merkadonan Finansiero (AFM).
14%. Banko Sentral ta konsiente ku introdukshon di un APR máksimo lo tin un impakto riba e sektor, i maske ku e ta nesesario pa protehá konsumidónan, lo mester tòg di un aserkamentu ku koutela. Ta p’esei Banko Sentral , pa por a yega na un APR máksimo a reuní tambe durante di un periodo largu, ku diferente partido relevante, entre otro sektornan relevante pa provishonnan di APR, wesnan di Korte Komun di Hustisia, ofisialnan di gobièrnu, i diferente otro “stakeholder”envolví den edukashon finansiero di konsumidónan.
Konsiderando tur e informashonnan aki i teniendo na kuenta struktura i komposishon di merkadonan di Kòrsou i di Sint Maarten, Banko Sentral a disidí na apliká un APR máksimo di 27%, ku ta drenta na vigor entrante 5 di mei 2017, ku un periodo di transishon di dos luna. E APR máksimo ta konta pa tur dunadó di fiansa ku ta operando tantu na Kòrsou komo na Sint Maarten. Intenshon ta pa baha e APR máksimo den fase den e añanan benidero, dependiendo di otro desaroyonan den merkado. E medida nobo aki di Banko ta reflehá esfuersonan pa oumentá su supervishon di komportashon, siguiendo di serka si institutonan finansiero ta tene nan mes na lei, eksigiendo ku nan ta duna krédito i otro servisio finansiero legal, hustu i imparsial. Banko ta konsiente ku introdukshon di un APR máksimo pa kombatí interes haltu lo tin un impakto riba oferta di fiansa i ku por bini un moveshon pa hasi fiansa den e sektor informal. Pero for di un perspektiva di supervishon, ta notando ku den e aktual merkado interesnan ta desproporshonal. Pa algun dunadó di fiansa e limitashon di interes lo tin impakto direkto riba nan entrada. Konsumidónan tambe lo keda afektá na momentu ku pa e motibu aki, dunadónan di fiansa duna ménos fiansa òf kambia nan kondishonnan, maske ku ta surgi e bentaha di interes mas abou i tambe e límite máksimo ku lo introdusí. Pa loke ta posibel kambio den e sektor informal mester tin kolaborashon entre Banko Sentral, Gobièrnu i Ministerio Públiko. Ta bin aserka ku un veredikto di Korte Komun di Hustisia na 2015 ta impedí institushonnan pa move bai den sektor informal ya ku e veredikto ta bisa bon kla ku tur fiansa duná sin pèrmit di Banko Sentral lo keda anulá.
Pa mas informashon tokante e tópiko aki por akudí na e wèpsait di Banko Sentral, www.centralbank.cw.