Diferente servisio di gobièrnu a haña animal- i matanan ku ta protehá bibu i morto i nan produktonan (manera kráneo-, medisinanan, karni), den maleta di pasaheronan, den fleta, den paketenan di pòst i riba marshenan. Tur ta trata di animal- i matanan ku ta protehá pa e tratado di CITES. Ministerio di Agrikultura, Naturalesa i Kalidat di alimento, Voedsel- en Warenautoriteit hulandes i Rijksdienst voor Ondernemend Nederland, Duana, Ministerio Públiko i Polis den e periodo di 1 di sèptèmber te 5 di novèmber 2017 a aktua mutuo kontra negoshi ilegal den mata- i animalnan protehá. E akshon tabata dirigí riba kontròl i dunamentu di informashon. E aktividatnan a tuma lugá den haf di Rotterdam, na aeropuerto Schiphol, na Hulanda Karibense, na kasnan partikular, den negoshi- i riba marshenan.
Internashonalmente ta kombatí transporte ilegal di mata i animal. Mas di 180 pais a hasi palabrashonnan mutuo tokante bendementu, transporte, kolekshon òf krio di mata i bestia protehá. E palabrashonnan aki ta poné den e tratado di CITES. CITES ta pará pa Convention on International Trade in Endangered Species of Wild Fauna and Flora ku tin komo meta pa prevení ku un espesie ta ekstinguí òf ta baha drástikamente den kantidat. P’esei Union Oropeo a publiká e asina yamá ‘Action Plan against Wildlife Trafficking 2016-2020’ ku kua Hulanda tambe a komprometé su mes. Akshon mutuo (Operashon Pangolin) ta bin riba e akshonnan regular ku ta sigui tuma lugá durante henter aña. E añanan benidero tambe lo tin akshonnan dirigí.
Patanan di un olifanti
En total e kontrolnan a produsí 59 kaso den kua a konfiská produktonan. Den pòst a topa ku diferente pakete ku skama di e animal afrikano Pangolin ku ta bou di menasa di ekstinshon hopi serio, ku tabata na kaminda di Afrika pa Asia via Hulanda (total 77 kilo). Na Schiphol a haña un pasahero ku 14.000 kabai di awa morto den maleta biahando pa China. Entretantu e pasahero akí a keda kondená na un kastigu di prizòn di seis luna di kua tres luna kondishonal i un tempu di prueba di dos aña.
Tambe a konfiská diferente orkidia, un kantidat di produkto di tiponan di palu protehá i 40 kilo di puiru di palu di kolebra. E inspektornan a haña tambe medisinanan ku ingredientenan di oso, un kueru di un oso polar, un kantidat di para bibu i 120 piska ‘arapaima’. Ademas a topa ku animalnan balsamá entre otro shoko i un ‘kobra’. Mas aleu e inspektornan a topa ku kráneonan di makaku i krokodel, shete kueru di animal òf partinan di esakinan di entre otro
un panter, dies transporte di koral bibu, un kaska di turtuga bèrdè, tres pata di un olifanti afrikano i seis barbulètè. Tabata transportá tur e kosnan akí ilegal i a konfiská nan.
Boneiru
Duana na Boneiru a konfiská den e periodo di akshon 267 kilo di karkó. Nan tabata na kaminda di Venezuela pa Boneiru. Ademas a konfiská diferente pida koral i kokolishi den ekipahe di turistanan na aeropuerto.
Marshe di para
Na un marshe di para na Zwolle a topa diferente para serka bendedónan di para ku no tabatin nan dokumentonan na òrdu òf di kua e renchinan di pata no tabata kuadra. A konfiská e paranan entre nan ‘wijnborstamazone’ (un tipo di lora) i un kantidat di e para ‘hop’ yamá. E dos sospechonan a paga un but di 5000 euro.
A hiba tur e paranan ku a konfiská bibu pa RVO.
Sondeo rápido
Pa saka afó si CITES ta konosí bou di habitantenan di Hulanda, a hasi un sondeo representativo. Gran mayoria di esnan ku a puntra (94%) ta duna di konosé ku nan sa ku no ta permití pa hasi negoshi ku, kolekshoná òf kria mata- i animalnan protehá internashonalmente. Alrededor di 63% sa kua reglanan tin i 1% a menshoná CITES spontáneo. De esnan di 70 aña i mas 30% konosé e tratado CITES pa nòmber i bou di esnan di 15 te ku 25 aña esaki ta 16%.