A base di e Wet arbeid vreemdelingen BES ta prohibí pa laga un strañero traha na Hulanda Karibense sin un pèrmit di trabou bálido (TWV, tewerkstellingsvergunning). Meta di e lei ta pa protehá merkado laboral lokal i pa para konkurensha deshonesto entre kompanianan i riba kondishonnan laboral. Pa haña un bista di e desaroyonan di e kantidat di strañero ku ta traha bou di un TWV, e Unidat SZW di RCN a hasi un análisis di trènt. Na Hulanda Karibense hopi bia ta usa strañero pa labor.
Den e temporada 2011-2016 dunadónan di trabou a entregá un total di 8.297 petishon pa un pèrmit di trabou serka e Unidat SZW. Na Boneiru i Sint Eustatius kasi 1 den kada 10 trahadó ta un strañero ku ta traha ku un pèrmit di trabou. Na Saba 1 den 5 trahadó ta strañero ku un pèrmit di trabou: trahando bou di un TWV. For di e análisis di e trènt ta sali ku despues di un oumento na 2012 i 2013 di e influks di strañero ku un pèrmit di trabou, e kantidat di dunadónan di trabou ku ta pidi un pèrmit di trabou TWV tambe a baha. Na Boneiru mas ku den pasado ta hasi uso di agensia di empleo c.q. kompania di detasher. Pa e motibu ei ta trata mas tantu di un uso mas fleksibel di personal riba merkado laboral. Na Sint Eustatius for di 2012 tin un kompania di metal grandi aktivo, ku ta laga hopi strañero traha a base di un TWV. E resultadonan aki ta un señal kla ku e manera di traha di merkado laboral den e Entidatnan Públiko ei a kambia.
Mayoria di e strañeronan ta bini di Repúblika Dominikano i otro paisnan den e region. E ora ei ta trata di Venezuela, Colombia i Peru. E di sinku pais for di kua tin hopi strañero ta bini ta China. Na Boneiru i Sint Eustatius e strañeronan ta voral hende hòmber (70-80%) miéntras ku na Saba e proporshon entre hòmber i muhé ta kasi 50/50.
Di un banda e eskala chikí di e islanan ta trese kuné ku no por yena tur funshon ku loke tin pa ofresé lokalmente. Por ehèmpel no ta eduká un profesor di medisina na e islanan i esaki ta masha spesífiko tambe. Di otro banda por hasi e pregunta si e kantidat di strañero ku ta duna trabou, por ehèmpel komo mètsla òf pelukera, ta nesesario di bèrdè mes.
E enfoke di e análisis tabata spesialmente pa investigá kon labor di strañero a desaroyá den e temporada 2011-2016. Entidat Públiko Boneiru (OLB, Openbaar Lichaam Bonaire) a laga hasi un investigashon orientativo di e situashon di imigrantenan na Boneiru. A base di e análisis di trènt aki i e investigashon bou di imigrante lo mester sigui papia mas aleu si mester adaptá e maneho rònt di strañero. P’esei lo ofresé e análisis di trènt na e Entidatnan Públiko i otro organisashonnan envolví. E rapòrt di e unidat di RCN SZW por haña riba www.rijksdienstcn.com/publicaties. E rapòrt di OLB por haña na www.bonairegov.com