Direktiva di Dutch Caribbean Nature Alliance (DCNA) resientemente a tene su promé reunion di direktiva pa 2021 den un seshon miksto virtual i ku partisipante en persona, pa tuma desishon i diskutí tokante strategianan krusial pa sigurá kontinuashon di aktividat di maneho ku e Organisashonnan di Maneho di Parke pa tur e seis islanan di Hulanda Karibense. Originalmente a planeá un reunion en persona na Sint Maarten, pero pa motibu di un oumento den kasonan di kontagio di COVID-19 na e islanan ABC desishon a kai pa tene un reunion miksto, ku algun miembro di Sint Maarten presente en persona, miéntras ku e otronan lo partisipá for di nan base di kas rònt Hulanda Karibense i Hulanda Oropeo.
E reunionnan di Direktiva di DCNA ta importante pa por diskutí i traha strategia tokante e forma mas efektivo pa sostené e maneho di organisashonnan di áreanan protehá na Hulanda Karibense, spesialmente den lus di e retonan signifikante ku e pandemia global di Covid-19 i otro preshonnan ku e Organisashonnan di Parke ta enfrentando. Gerensia di e Organisashon di Parkenan tabatin tambe oportunidat di informá e otronan tokante algun di e retonan i éksitonan ku e parkenan ta eksperensiá den nan lucha pa kontinuá salbaguardiá naturalesa na Hulanda Karibense.
A tuma tambe diferente desishon di gobernashon inkluso desishonnan relashoná ku bon gobernashon finansiero, pago di Conservation Trust Fund i e sosten ku e ret di kontakto di DCNA ta duna ku finansa periódiko pa medio di lòbi ku e ta hasi na nòmber di e organisashonnan di konservashon den Hulanda Karibense.
DCNA su ret di kontakto di konservashon, ta proveé sosten na e Organisashonnan di Maneho di Áreanan Protehá riba tur seis isla di Hulanda Karibense: Aruba National Parks Foundation, STINAPA Bonaire, CARMABI Curaçao, STENAPA St. Eustatius, the Saba Conservation Foundation i Sint Maarten Nature Foundation. Un komponente importante ku a diskutí durante e reunion di Direktiva ta e importansia di implementashon di un strategia ku lo stimulá e desaroyo di turismo duradero pa e islanan, kreando chèns pa Hulanda Karibense por sali for di e retonan ku e pandemia a trese kuné, ku un enfoke mas grandi riba ekonomianan bèrdè i blou. Fuera di e managernan di konservashon i e diferente ekspertonan di e Direktiva di DCNA tabatin partisipashon tambe na e último reunion di Direktiva di DCNA akí, di opservadónan di parti di Fondo Mundial pa Naturalesa na Hulanda (WWF-NL), di e Union Internashonal pa Konservashon di Naturalesa (IUCN-NL), BirdLife Hulanda, Observation International i e Ministerio di Agrikultura, Naturalesa i Kalidat di Kuminda (LNV).
E siguiente Konvenshon di DCNA ta planeá pa 22-24 di novèmber na Kòrsou. E konvenshon di DCNA no tin solamente e Reunion di Direktiva riba agènda, pero tambe diferente tayer pa e organisashonnan di áreanan protehá di e seis islanan di Hulanda Karibense, tresiendo huntu institutonan sientífiko, stakeholdernan i embahadornan hubenil di naturalesa lokal huntu pa interkambio di konosementu i desaroyo di kapasidat.