APC Bank a optené lisensia komo banko komersial

Willemstad – Despues di un proseso ekstenso di preparashon, APC Bank resientemente a optené su lisensia komersial di Banko Sentral di Kòrsou i St. Maarten. Awor ku e banko ta disponé di e lisensia pa por operá na Kòrsou i St. Maarten, trabounan lo sigui pa lansa APC Bank riba e merkadonan aki.
APC Bank a keda establesé na aprel 2020. Na luna di mei, APC Bank a kumpra e akshonnan di PSB i aktualmente APC Bank ta hasiendo e trámitenan pa kumpra e akshonnan di CHB próksimamente. Banda di e desaroyonan aki, den e último lunanan a traha intensivamente riba entre otro APC Bank su plan stratégiko (“business plan”) i su plan di kapitalisashon.
Awor ku APC Bank a optené su lisensia, e banko a inisiá su trayekto di komunikashon pa mantené tur grupo di interes debidamente informá tokante e desaroyonan. E promé fase di e trayekto aki ta konsistí di informashon general i segun e trayekto avansá, lo sigui komuniká.
Dunando inisio na e trayekto di komunikashon, riba djabièrnè 15 di yanüari 2021 señor Oswin (Oz) Eleonora, presidente di hunta di komisario di APC Bank, a duna informashon na empleadonan di PSB i CHB tokante e desaroyonan menshoná.
Komunidat en gerenal tambe ta un grupo di interes importante i por spera di sigui risibí informashon ku regularidat.