E servisio di Girobank NV a start trankil awe mainta. Manera a anunsiá promé e filialnan di Janwe, Jan Noorduynweg i Scharloo tabata habrí awe te mitar di 4. Komo hopi hende pareu a hasi uso di on-line banking, tabatin momentu awe ku e sistema on-line no tabata alkansabel. Entre tantu a solushoná esaki. Centrale Bank van Curaçao en Sint Maarten (CBCS) i Girobank NV ta enfatisá un biaha mas ku no ta posibel pa kobra chèk di Giro, ni na Girobank mes, ni na otro banko komersial. Pa loke ta uso di e tarheta bankario di Giro, por usa esaki normalmente pa paga kuné (swipe). Doñonan di pakus tin e garantia ku nan ta haña pagonan via swipe. P’esei no tin niun motibu pa nenga tarhetanan bankario di Giro. Banda di esei CBCS ke aklará algun punto enkuanto e garantia di NAf.10.000 pa kliente. Ta konsiderá un kuenta i/òf komo ún kliente; esei ta konta tambe pa un kuenta ku un persona outorisá (por ehèmpel un yu menor di edat i su mayor). Si e kliente tin dos kuenta òf mas, e por disponé di NAf. 10.000 en total (ku eksepshon di plaka ku a drenta despues di e moratorio). No ta asina ku por kita NAf. 10.000 di kada kuenta. E informashon aki i hopi mas por haña bèk riba e website di CBCS: https://www.centralbank.cw/girobank-nv/press-releases. Pa pregunta adishonal por hasi uso di e siguiente email adrès: giro@centralbank.cw
