Willemstad- Riba 28 i 29 di yüni Centrale Bank van Curaçao en Sint Maarten (CBCS) ta organisá, den koperashon ku Cinex, Bridging Financial Innovation and Regulation seminar 2018. Ku oradónan invitá renombrá manera Paul Andrews, (sekretario general di IOSCO), Gabriel Abed (Bitt Inc), Jerry Hultin (Global Future Group), Olivier Rikken (Blockchain & Smart Contract Expert) i Ryan Peterson (Centrale Bank van Aruba), nos lo diskutí e inovashonnan teknológiko den sektor finansiero den kuadro di regulashon lokal.
CBCS ta rekonosé e nesesidat na i demanda pa produktonan i servisionan inovativo i ta pará kla pa e desaroyonan nobo aki, basta nan ta kuadra ku normanan i prinsipionan internashonal. Durante e Bridging Financial Innovation and Regulation seminar lo trata di aserka e inovashonnan aki di diferente banda.
E seminario ta repartí di siguiente manera:
Djaweps mainta 28 di yüni lo elaborá tokante e konseptonan “fintech” (entre otro “Blockchain” i “Smart Application”) i “regtech” (“regulatory technology”). Ta konseptonan ku último tempu nos ta tende mas i mas, pero kiko nan ta nifiká i kiko nan tin komun ku otro? E seshonnan lo ta kompletamente grátis i aksesibel pa públiko general i lo por sigui nan via Live Stream riba CBCS su página di Facebook.
E mesun dia lo tin charla durante di lùnch ku komo oradó Señor Paul Andrews di ISOCO. Sr. Andrews lo trata e desaroyonan ku a tuma lugá kaba i kiko nos por spera den futuro serkano. Gastunan di partisipashon na e charla durante di lùnch ta USD 55,=.
Djabièrnè 29 di yüni e programa lo ta enfoká riba nos sektor finansiero i entidatnan regulatorio regional. Durante e dia aki lo elaborá riba desaroyo teknológiko versus supervishon. Minister Dr. I. Steven Martina di MEO e mèrdia ei lo elaborá durante di lùnch tokante ‘smart cities”, e koperashon entre sektor privá i públiko. Partisipashon na e dia aki ta kosta USD 100,=
Debí na kantidat di stul limitá, ta nesesario inskribí pa tur seshon ariba menshoná. Por inskribí for di 8 di yüni via: www.curinvest.com/bridginginnovations