Entrante promé di yüli 2021, organisashonnan di akohida di mucha na Boneiru i Sint Eustatius ta haña mas supsidio for di Gobièrnu Sentral, pa asina nan por baha e kontribushon di mayor mas tantu. Esaki ta un siguiente paso di e programa BES(t) 4 kids pa ofresé akohida di mucha di bon kalidat, seif i pagabel pa mucha di Hulanda Karibense.
Organisashonnan di akohida di mucha i akohida despues di skol na Boneiru i Sint Eustatius a bini na remarke pa un supsidio di redukshon di preis di kosto for di aña pasa. Ku e supsidio akí un organisashon di akohida di mucha por baha e kontribushon di mayor i/òf tuma medidanan pa mehorá kalidat di akohida. Entrante promé di yüli ta oumentá e supsidio aki, pa asina organisashonnan di akohida di mucha por sigui baha e kontribushon di mayor.
Montante kontribushon di mayor na Boneiru
E kontribushon máksimo ku un organisashon di akohida di mucha por a pidi mayornan ta baha for di promé di yüli 2021 di 200 dòler pa un máksimo di 125 dòler pa mucha pa luna. E montante aki ta konta pa 5 dia di akohida di mucha i pa 5 dia di akohida despues di skol pa siman. E kontribushon di mayor pa akohida di mucha serka un ‘gastouder’, ta suma 100 dòler entrante di promé di yüli. Si na e momentunan aki, un organisashon di akohida di mucha ta kobra e mayornan mas ku e kontribushon máksimo di mayor, e organisashon di akohida di mucha mester baha e tarifa entrante promé di yüli 2021. Si e kontribushon di mayor ta abou kaba, e ora ei e akohida di mucha no mester baha e montante.
Mayornan ku no por paga e kontribushon di mayor, por pidi un supsidio pa un lugá na akohida, serka e Entidat Públiko.
Montante kontribushon di mayor na Sint Eustatius i Saba
E kontribushon di mayor na Sint Eustatius ta baha entrante di promé di yüli 2021, di 150 dòler pa 100 dòler pa luna pa 5 dia di akohida di mucha. Akohida despues di skol ta baha di 75 dòler pa 50 dòler pa luna.
Na Saba, e kontribushon di mayor ta 100 dòler kaba pa luna pa akohida di mucha i 50 dòler pa luna pa akohida despues di skol.
Na Saba i Sint Eustatius tambe, mayornan ku no por paga e kontribushon di mayor, por pidi un supsidio pa un lugá na akohida serka Entidat Públiko.
Mas informashon tokante e programa di BES(t) 4 kids ta disponibel riba www.best4kids.nu.