E tayer virtual di medionan sosial, ku ta na enkargo di Evita Sanchez di MPOWR i ta kordiná pa Dutch Caribbean Nature Alliance (DCNA) ku e meta pa sostené e strategianan di maneho di organisashonnan di maneho di áreanan protehá di e seis islanan di Hulanda Karibense, a kuminsá djabièrnè 23 di òktober.
Komunikashon tokante asuntu di konservashon di naturalesa por ta un tarea trabahoso, pa motibu ku e tópikonan hopi biaha ta asosiá ku status i tendensianan di ekosistemanan denter di e áreanan protehá anto esaki no tur ora ta algu ku ta di interes pa un grupo grandi di públiko. Pa por komuniká efektivamente mester tene kuenta ku e oudiensia i naturalmente e relevansia di e tópiko. Sinembargo e pregunta ta keda: kon ta komuniká efektivamente ku un otro partido tokante naturalesa i ku nos dependensia di dje ta ekstremamente mará na otro?
Medionan sosial ta un hèrmènt efektivo di komunikashon, ku e parkenan ta usa pa eksponé nan aktividatnan diario na komunidat i pa hasi kontakto ku nan siguidónan. Ademas esaki ta inspirá e sentido di propietario i responsabilidat di komunidat, ku ta stimulá e sentido pa pone mas i mas persona bira embolbí den konservashon. Dor di COVID-19, e restrikshonnan ku esaki a trese kuné a hasi nan impakto riba e Parkenan di Hulanda Karibense. Retonan ta kon pa komuniká ku públiko tokante e reglanan apropiá (manera distansia sosial riba e rutanan di kaminata òf te hasta den e ofisinanan di parke). E efektonan ta inkluí mas presensia riba internèt espesialmente via medionan sosial, pa sigurá ku públiko ta konsiente ku e aktividatnan di parke no a para ketu, apesar di e medidanan drástiko ku e pandemia a trese kuné.
“Komunikashon efektivo via internèt espesialmente riba medionan sosial, awendia ta di sumo importansia pa e maneho di áreanan protehá, pa sigurá ku e habitantenan di e isla i e bishitante no ta haña solamente informashon, pero tambe ta inspirá nan i pa nan komprendé e aktividatnan, reglanan i regulashonnan di konservashon. Ademas medionan sosial ta un instrumento balioso pa hisa konsiensia di e importansia di nos naturalesa úniko i frágil pa e futuro bienestar sosial i ekonómiko di nos islanan i di kombatí tópikonan ku ta afektá nan.”- asina Tineke van Bussel-e empleado di Komunikashon di Investigashon di DCNA ta splika.
Un di e tareanan fundamental di DCNA ta promové i fasilitá fomento di kapasidat, interkambio di konosementu, training i kooperashon. Pa medio di e proyekto akí, e empleadonan di komunikashon a risibí training tokante Merkadeo via Facebook ku Instagram. Despues di e training, e partisipantenan ta kapasitá awor ku e konosementu i hèrmèntnan pa hisa konsiensia di e nòmber òf marka di nan produkto i di e kompromiso ku nan kliente.
“Edukashon pa medio di komunikashon, tokante mantenshon di kalidat di medioambiente tin un papel importante den konservashon na 2020. E tayer di komunikashon via medionan sosial a yuda mi komo ku mi a siña hèrmèntnan nobo ku por trese i hisa e embolbimentu ku medionan sosial na un manera mas efisiente.” Rissa Rampersad, e empleado di Edukashon & Komunikashon, di Saba Conservation Foundation a deklará.