Riba petishon di Centrale Bank van Curaçao en Sint Maarten (CBCS) Korte den Promé Instansia na Kòrsou dia 5 di sèptèmber 2019 a pronunsiá e areglo di emergensia pa ku Banco del Orinoco N.V.. CBCS a tene un konferensia di prensa dia 5 di sèptèmber 2019 pa 15:30 or. Durante e konferensia di prensa aki, CBCS a aklará ku a stòp servisio regular di Banco del Orinoco N.V. dia 5 di sèptèmber. Banco del Orinoco N.V. lo no ofresé servisio nobo mas ni lo no aseptá kliente nobo mas. Komo konsekuensia di e areglo di emergensia ku a drenta na vigor, no por obligá Banco del Orinoco N.V. mas pa kumpli ku su obligashonnan. E propiedatnan di Banco del Orinoco N.V. por lo pronto ta kongelá. Esaki ta nifiká ku klientenan na e momentu aki no por lanta sèn mas. Ademas klientenan no por transferí sèn mas di Banco del Orinoco N.V. pa un otro kuenta bankario. Pa demas kreditornan pronunsiamentu di e areglo di emergensia ta enserá ku Banco del Orinoco N.V. na e momentu aki lo no por kumpli ku su obligashonnan di pago. Kasonan hurídiko kontra Banco del Orinoco N.V. ta suspendé. Tambe ehekushon di sentensianan i e ehekushon di areglonan di pago ta suspendé. Embargonan riba propiedatnan di Banco del Orinoco N.V. lo kaduká. Pues klientenan i sobra kreditornan por lo pronto lo no por ehersé nan derechonan pa ku Banco del Orinoco N.V.. Nan ta mantené sinembargo nan demandanan riba Banco del Orinoco N.V. Na e momentu aki no ta sigur ku Banco del Orinoco N.V. por paga bèk tur kliente i kreditornan kompletamente.
Ora pronunsiá e areglo di emergensia ta apuntá un atministradó (bewindvoerder). E atministradó lo inventarisá e propiedatnan i debeman eksistente di Banco del Orinoco N.V. Por dura un tempu largu promé ku e atministradó por haña un bon bista di esakinan. Durante e proseso aki lo duna mas informashon tokante e konklushonnan i e trayekto ku lo kontinuá.
CBCS na e momentu aki no por duna un indikashon di durashon di ehekushon di e areglo di emergensia pa ku Banco del Orinoco N.V. Pa kualke pregunta, pronto lo publiká e informashon di kontakto riba e wepsait di tantu Banco del Orinoco N.V. komo CBCS.