Banko Sentral di Kòrsou i Sint Maarten ta restringí maneho monetario

cbcs.jpg

Centrale Bank van Curaçao en Sint Maarten (CBCS) ta konsiderá prudente pa di un forma preventivo stabilisá e bahada gradual den reserva bruto ofisial i kobertura di importashon. Esaki ta duna gobièrnu di tantu Kòrsou komo Sint Maarten e espasio pa:

– Implementá un maneho ekonómiko firme. – Redusí di un forma gradual i duradero e défisit presupuestario. – Implementá reformanan struktural.

Tur esaki pa fortifiká e posishon kompetitivo, realisá un kresementu duradero di eksportashon, i moderá e oumento di importashon. Di e manera aki por redusí e défisit riba kuenta koriente di balansa di pago i por fortifiká e reserva di divisa.

For di ougùstùs 2018 reserva bruto ofisial (ekskluyendo oro) ta bahando gradualmente. Konsekuentemente, e kobertura di importashon a baha poulatinamente te na aproksimadamente 3,7 luna durante e promé mitar di yüli 2019.

E motibunan prinsipal di e desaroyo aki ta:

1. E shòknan eksterno fuerte ku e paisnan di union monetario a konfrontá. E destrukshon ku e orkan a okashoná na Sint Maarten a afektá turismo. Ademas, e krísis na Venezuela a afektá e sektor di industria (refineria), haf, aviashon (bankarota di InselAir) i zona franka di Kòrsou. 2. Finalisashon di saneamentu di debe di Antia Hulandes dor di Hulanda i konsekuentemente terminashon di entrada di divisa relashoná ku esaki. 3. Oumento di importashon debí na un subida di preis di krudo i trabou di rekonstrukshon na Sint Maarten. 4. Oumento di tasa di interes riba merkado internashonal.

E maneho monetario restriktivo ta enserá ku den di dos mitar di ougùstùs 2019, CBCS ta reanudá e findishi di Sertifikado di Depósito kada kinsena bou di e bankonan komersial lokal. Riba base regular lo ofresé Sertifikado di Depósito tantu na florin (NAf) komo na dòler Merikano (USD). E Sertifikadonan di Depósito na florin tin komo meta, redusí e ekseso di likides den e sistema bankario, miéntras ku e Sertifikadonan di Depósito na dòler Merikano mester hasi mas atraktivo
pa bankonan mantené dòler na CBCS. Ademas, CBCS a tuma e desishon pa mantené e tasa di interes ofisial, beleningsrente, na 2,50%.

Leave a Reply

Your email address will not be published. Required fields are marked *

scroll to top