Den preparashon pa elekshon riba 20 di mart 2019 a tuma lugá un training di dos dia pa kandidato di partidonan polítiko di Boneiru. Entidat Públiko Boneiru (OLB) a organisá esaki huntu ku Ministerio di Asuntunan Interno i Relashonnan den Reino, Wethoudersvereniging i Universidat di Aruba.
Durante e dos dianan di training, ku a tuma lugá na Plaza Resort Bonaire, vários entrenadó eksperensiá a profundisá riba kiko un miembro di konseho òf mandatario mester sa na Boneiru den su ròl spesífiko, pa asina e por ehersé e trabou mas mihó posibel. Temanan tratá tabata entre otro bon gobernashon, liderazgo, i komunikashon efektivo. No a trata solamente e teoria. Tambe a hasi un konekshon ku práktika diario. Ademas e partisipantenan a amplia nan konosementu tokante funshonamentu di Konseho Insular i Kolegio Ehekutivo en general.
Gezaghèber Edison Rijna tambe tabata presente i a duna di konosé di ta satisfecho ku e dos dia di training i e echo ku e partisipantenan, apesar di nan diferensianan ideológiko i polítiko, a anda kolegialmente ku otro. Esaki ta duna speransa pa un impulso positivo na demokrasia lokal. Ademas e programa ta permití pa miembronan di Konseho Insular i Kolegio Ehekutivo por tin un komienso eksitoso direktamente despues di elekshon di 20 di mart. Na final e partisipantenan a risibí un sertifikado di partisipashon. Kasi tur partido polítiko a partisipá na e training di dos dia.
Entidat Públiko huntu ku e partnernan menshoná anteriormente lo sigui duna training i kurso periódikamente durante e temporada di gobernashon nobo. Esaki tin komo resultado ku miembronan di Konseho Insular i diputadonan ta haña informashon i instrumento strukturalmente pa asina nan por ehersé nan trabou legal riba nivel. E proseso demokrátiko ta fortifiká mas i mas di e manera aki.