Tantu na Boneiru i Sint Eustatius komo na Saba un tres kuart di e poblashon di 15 aña p’ariba ta sinti nan mes salú òf masha salú, asina nan a bisa ora a puntra nan na 2017/2018. Na tur tres isla hende hòmber ta mas positivo tokante nan salú ku hende muhé. Asina CBS ta bisa a base di sifra nobo.
Hòmber ta sinti nan mes mas salú ku muhé. Na Boneiru 80 porshento di e hòmbernan i 71 porshento di e muhénan ta sinti nan mes (masha) salú na 2017/2018. Na Saba ta trata di 87 porshento di e hòmbernan i 73 porshento di e muhénan, i na Sint Eustatius ta 79 porshento di e hòmbernan i 63 porshento di e muhénan.
Esnan di 45 aña p’riba ta sinti nan mes ménos salú
Na tur isla na Hulanda Karibense hóben ta mas positivo tokante nan salú ku hende mas grandi di edat. Tantu na Boneiru i Saba komo na Sint Eustatius habitante mas hóben ku 45 aña ta sinti nan mes mas salú ku habitante di 45 pa 65 aña. Na Boneiru esnan di 45 pa 65 aña ta mas positivo tokante nan salú ku esnan di 65 p’ariba. Na Saba i Sint Eustatius e diferensia no ta signifikante.
Salú di hòmber òf muhé ta diferente for di 45 aña
Na niun di e tres islanan di Hulanda Karibense no por mira un diferensha den e eksperensia di salú entre hòmber i muhé di 15 te 45 aña. Pero na Saba i Sint Eustatius hòmber di 45 aña òf mas bieu ta sinti nan mes mas salú ku muhé na e edat ei. Na Saba 84 porshento di e hòmbernan di e edat aki ta sinti nan mes (masha) salú, kompará ku 54 porshento di e muhénan. Na Sint Eustatius 69 porshento di e hòmbernan i 44 di e muhénan di e edat aki ta sinti nan mes (masha) salú. Na Boneiru p’esaki no por mira un diferensha signifikante.
Fuente
StatLine – Hulanda Karibense: salú i malesa; karakterístika di persona
http://opendata.cbs.nl/statline/#/CBS/nl/dataset/82291NED/table?dl=19035