Mihó uso di e lista di komparashon di prèis ta posibel
For di reakshonan risibí por konkluí ku serka e konsumidónan tin un malentendimentu tokante e lista di komparashon di prèis ku Unkobon, FtpKB y e ministerio di asuntonan ekonómiko ta publiká mensualmente. Algun konsumidó ta pensa ku un supermerkado ku ta posishoná haltu riba e lista, semper ta mas barata ku esnan mas abou riba e lista. Esaki sinembargo ta kuadra solamente si den un supermerkado tur e 60 produktonan ta wòrdu kumprá. E lista ta indiká kua supermerkado ku tin e makutu ku tur e 60 produktonan, ta mas barata.
Un konsumidó ku no tin hopi kos di kumpra por sali mas ekonómiko serka un supermerkado ku ta posishoná mas abao riba e lista.
Komo tal ta rekomendabel pa ora ta bai hasi kompras pa traha un lista y kompará esaki ku e lista ekstenso ku Unkobon tin riba su website. Den kaso e konsumidó no kier bai leu foi kas, por kompará e supermerkadonan den su bario.
Por ehèmpel: e tres supermerkado mas serka di bo kas ta Karibe Nobo, Fruteria Union y van den Tweel. Ora tira un bista riba e lista di posishon Karibe Nobo ta mas barata y Fruteria Union mas karu pa un makuto di e 60 produktonan. Sinembargo si bo mester solamente 13 produkto p.e. Hariña, pan blanku, cornflakes, macaroni, kidney beans, filèt di galiña, batata, banana, batata dushi, wòrtel, zeta dushi, kòfi y habon pa laba paña, Fruteria Union ta mas barata y Karibe Nobo esun mas karu. Un ke otro segun e komparashon di prèis di luna di yanuari.
Pa un lista di kompras ku 13 otro produkto Karibe Nobo y van den Tweel por ta esun di mas barata. E konsumidó konsiénte pues ta kompará promé su lista di kompras ku e datonan detayá riba e website www.Unkobon.org.
Prèisnan di e makuto di 60 produkto den yanuari a subi un tiki kompará ku desember. Den yanuari Warehouse a bolbe sali e supermerkado di mas barata. E diferensha ku nr 2, Wing Cheung, ta birando mas chikí.