Kuido ku kumpramentu di outo online na Merka

E último lunanan aki vários persona a hasi denunsia na polis di estafa via di Internet.
Riba Internet tin vários aviso ku ta propagandá benta di vehíkulo bon i barata for di Merka. Ta ofresé e outonan na un bon preis i tur informashon di e outo ta pará nechi den e aviso. Negosiashon ku e bendedó ta parse legítimo. E kumpradó na promé instante mester paga solamente un kouta inisial (down payment) i sobrá na momentu ku e vehíkulo yega Boneiru.
Tambe e kumpradó ta haña un karta ku ta konfirmá ku ta pone e outo riba barku i ku por sigui esaki via un kódigo di track & trace ku tin den e karta.
Pa seguro i gastu di kònteiner mester hasi un pago adishonal. Despues ku hasi e down payment i paga e kostonan di seguro i di kònteiner e kumpradó hopi bia no ta tende nada mas. Ora purba drenta den kontakto ku e bendedó òf e kompania di transporte marítimo ta bisa ku duana a konfiská e kònteiner ku e outo aden. Vários biaha ta bisa ku esaki a sosodé dor ku a haña droga i/òf arma den e kònteiner.
E outonan nunka mas no ta yega serka e víktima i nan no ta haña nan sèn bek tampoko. Kuerpo Polisial Hulanda Karibense ta atvertí tur hende pa ta kouteloso ora ta kumpra outo via di Internet. Ta pidi personanan ku a pasa dor di un eksperensia similar pa hasi denunsia na polis.