Transparensha di prèis ta na interes di e konsumidó. E lista di komparashon di prèis ku e organisashonan FtpKB y Unkobon den koperashon ku EZK ta publiká mensualmente, ta duna un bista transparente y objektivo di e preisnan di e makuto konteniendo 60 produkto serka 15 diferente supermerkado. Ku e lista di komparashon di preis aki e konsumidó por nota mesora kon e preisnan ta varia entre e 15 supermerkadonan aki.
Den luna di òktober e prèisnan di e makuto a baha un poko den komparashon ku esnan di sèptèmber. E prèisnan a baha ku un promedio di kasi 2%. E produktonan mas barata a baha ku kasi 1% y esnan mas karu a baha ku kasi 3%.
E redukshon grandi di prèis, ku por a wòrdu notá na algun di e supermerkadonan, tin di haber ku den luna di òktober banda di un produkto di marka ta tin tambe e mesun produkto pero di un marka menos konosí y mas barata.
Si kompará e sifranan di e ultimo tres lunanan por konkluí ku koutela ku e supermerkadonan mas karu a move bai mei mei riba e lista. Nan a bira menos karu.
E prèisnan ta wòrdu standarisá pa kilo, pa liter òf pa un produkto. Riba e website unkobon.org por mira e prèisnan detayá di tur e produktonan pa kada un supermerkado. Ku e datonan aki por nota ku e nr dos riba e lista tin 12 produkto di mas barata y kua nan ta. Tambe por nota ku e total di e prèisnan mas haltu ($ 495,00) ta no menos ku 2.4 biaha mas haltu ku e total di e prèisnan mas abou ($ 206,00). Konsumidónan ku kumpra konsientemente por spar sentenares di dollar pa luna.
- Sunday, May 19, 2024
