E struktura nobo pa tarifa di koriente ku a keda introdusí dia 1 di aprel 2018 a lanta hopi tera. Awó ku e stòf a baha y ku entrante 1 di yuni 2018 e tarifa fiho nobo a drenta na vigor, Unkobon ta puntra su mes di kon kasnan doméstiko a risibí menos subsidio ku e kompanianan.
Manera ya konosí entrante 1 di aprel 2018 e tarifa variabel pa koriente ta $ 0.2584 pa kWh (kilowattuur). Esaki e konsumidó ta paga pa e koriente ku e usa. Banda di e tarifa variabel aki tin un tarifa fiho dependiente di e kapasidat di konekshon di e kas.
Dia 30 di mei último WEB a publiká e tarifanan aki den kual a keda menshoná e kategorianan (aansluitcapaciteit) y e montantenan di subsidio ku a keda otorgá pa kada un. Unkobon, pa medio di un gráfiko, kier ilustrá e diskuento ku Kolegio Ehekutivo a otorgá na e diferente kategorianan.
Boneiru ta konta ku mas o menos 10.000 konekshon di koriente di kual alrededor di 8300 (83%) tin un kapasidat te ku 3 x 35 ampère ku ta kai bou di konekshon chikí y ku ta sali $ 28.00 pa luna entrante 1 di yuni. Esaki e konsumidó mester paga ounke ku e no a usa koriente e luna ei.
Di e kategorianan 3 x 50 te ku 3 x 80 Ampère tin alrededor di 1400 (14%) konekshon. Mayoria di e kasnan doméstiko tin e konekshon chikí. E konekshonnan pisá kasi tur ta di kompanianan.
Lo por tin motibunan bálido di kon kompanianan a risibí 47% di e subsidio y mayoria di e kasnan doméstiko 37%. Pa Unkobon e motivashon tras di e desishon aki sinembargo no ta konosí. Komo mas ku mitar di e kasnan doméstiko lo haña nan mes konfrontá ku un oumento di 20% of mas den komparashon ku 2017, Unkobon ta haña ku ta tarea di Kolegio Ehekutivo pa duna un splikashon di e eskoho aki.
- Sunday, May 19, 2024
