Willemstad – Banko Sentral di Kòrsou i Sint Maarten (CBCS) a disidí den konkordansia ku artíkulo 7, insiso 1 di e statuto di Banko Sentral di Kòrsou i Sint Maarten pa entrante 31 di yüli 2018 retirá for di sirkulashon tur denominashon di plakanan di papel di florin Antiano di añanan di emishon 1986 te ku 1994. Ta trata aki di e denominashon nan NAf 5, NAf 10, NAf 25, NAf 50, NAf 100 i NAf 250 di e seri di paranan sin e imprenta di foli koló di oro.
Komo konsekuensia di esaki, entrante 1 di ougùstùs 2018 no por usa plakanan di papel di e añanan di emishon menshoná mas komo medio legal di pago i ta permití entrante e fecha ei pa rechasá nan komo tal. Esaki ta enserá ku entrante e fecha ei, no por hasi pagonan kèsh mas ku e plakanan di papel ei.
E desishon pa retirá e plakanan di papel for di sirkulashon ta basá riba un evaluashon periódiko di plakanan di papel den sirkulashon. Na momentu di evaluashon ta wak prinsipalmente e kalidat di e plakanan di papel. E plakanan di papel di e seri 1986 no ta kumpli mas ku nos eksigensianan di kalidat.
Si akaso bo ta disponé di plakanan di papel di e añanan di emishon 1986-1994, nos ta supliká bo pa kambia nan sea na un banko komersial òf na CBCS. Entrante 1 di ougùstùs 2018 te ku 31 di yüli 2048 lo por kambia e plakanan di papel aki solamente na CBCS. Konforme artíkulo 7, insiso 3 di e statuto di Banko Sentral di Kòrsou i Sint Maarten e derechi pa demandá kambio di plakanan di papel ei ta kaduká despues di 31 di yüli 2048.
CENTRALE BANK VAN CURACAO EN SINT MAARTEN