Di e tres islanan di Hulanda Karibense, Saba ku 33 porshento, tin un porsentahe relativamente haltu di personanan ku preparashon haltu. Na Boneiru i Sint Eustatius respektivamente 18 i 20 porshento di e poblashon di 25 te 75 aña tin preparashon haltu. Disiplinanan hopi komun bou di personanan ku preparashon haltu ta derecho, atministrashon, komersio i servisio komersial. Esei ta resaltá for di sifranan nobo di enseñansa den 2016 basá riba e Investigashon di forsa laboral Hulanda Karibense (AKO CN) ku CBS ta publiká awe.
Por lo general, e generashonnan mas yòn hopi bia tin preparashon mas haltu ku e generashonnan mas bieu. Pa Sint Eustatius ta konta sinembargo ku esnan di 45 te 55 aña tin preparashon mas haltu ku e generashonnan mas yòn, i na Boneiru ta konta ku esnan di 25 te 35 aña tin mes tantu bia preparashon haltu ku esnan di 45 te 55 aña. Aparte di esei na Boneiru e porsentahe di personanan ku preparashon sekundario ta oumentando bou di e generashonnan mas yòn. Pa ámbos isla ta konta ku hóbennan mester bandoná e isla pa por siguí enseñansa haltu. Si despues nan ta regresá di nobo i na ki edat esei ta, tin entre otro di aber ku empleo ku tin pa personanan ku preparashon haltu.
Hopi di e personanan ku preparashon haltu na Saba ta merikano òf kanades
Na Saba e porsentahe di personanan ku preparashon haltu bou di e generashonnan mas yòn ta mas haltu si ku bou di generashonnan mas bieu. Esaki tin de aber ku presensia di un universidat riba e isla, spesialisá den medisina. Un parti di esnan di 25 aña i mas ainda ta sigui un estudio i hopi bes ta trata di esnan ku preparashon haltu. Por ehèmpel 30 porshento di personanan ku preparashon haltu ta bisa ku ainda nan ta siguiendo enseñansa. Banda di esei kasi mitar (47 porshento) di e personanan ku preparashon haltu ta trahando den e sektor di enseñansa, entre kua e universidat. Ademas personanan ku preparashon haltu na Saba tin partikularmente nashonalidat merikano òf kanades i no a nase riba e isla, i esei ta konta sigur pa esnan ku ta sigui enseñansa.
Mas hende muhé ku hende hòmber ku preparashon haltu na Boneiru i Sint Eustatius
Bou di hende muhé na Boneiru i Sint Eustatius e porsentahe di personanan ku preparashon haltu ta mas haltu ku bou di hende hòmber. Por ehèmpel 21 porshento di hende muhé i 16 porshento di hende hòmber na Boneiru tabatin un diploma di hbo òf akadémiko den 2016. Na Sint Eustatius tabata trata di respektivamente 23 porshento i 18 porshento. Al kontrario ta asina ku riba ámbos isla e porsentahe di esnan ku preparashon abou ta mas haltu bou di hende hòmber. Na Saba no tin diferensia entre ámbos sekso ora ta trata di e porsentahe di esnan ku preparashon haltu. Si ta asina ku hende muhé riba e isla mas bia tin preparashon sekundario ku hende hòmber.
Personanan ku preparashon haltu partikularmente den disiplina di derecho, atministrashon, komersio i servisio komersial
Personanan ku preparashon haltu na Boneiru i Sint Eustatius a sigui partikularmente un formashon den disiplina di derecho, atministrashon, komersio i servisio komersial. Pa Saba ta trata partikularmente e disiplina di matemátika i siensia natural, entre kua biologia i biokímika. Den sierto sentido ta trata aki pa un parti di personanan ku ainda ta hasi un estudio. Si ignorá nan e ora ei na Saba tambe derecho, atministrashon, komersio i servisio komersial ta e disiplinanan mas komun bou di esnan ku preparashon haltu.
Fuente:
StatLine: Caribisch Nederland; bevolking hoogst behaald onderwijsniveau en -richting
https://opendata.cbs.nl/statline/#/CBS/nl/dataset/83861NED