Den 2017 avionnan a bula kasi 21 mil bes for di, i pa Hulanda Karibense, un subida di 5 porshento kompará ku 2016. Na Boneiru i Sint Eustatius e kantidat di moveshon di avionnan a subi ku respektivamente mas di 10 i mas di 7 porshento. Na Saba, unda e aeropuerto di mas chikitu di Hulanda Karibense ta situá, e kantidat di moveshonnan a baha ku kasi 16 porshento. Esaki CBS ta reportá basá riba sifranan nobo.
Tráfiko aéreo interumpí dor di orkan Irma
E bahada di e kantidat di buelo for di, i pa Saba, ta entre otro konsekuensia di orkan Irma, ku den sèptèmber 2017 a sòru pa hopi molèster den e region. E aeropuerto di Saba tabata un siman i mei será i e orario normal di servisio tabata bruá simannan largu. Na sèptèmber 2017 a ehekutá 90 buelo pa Saba, na sèptèmber 2016 esaki tabata 260.
Na Sint Eustatius tambe tráfiko aéreo no tabata posibel un par di dia i e orario di servisio tabata bruá temporalmente, di manera ku e kantidat di moveshonnan aéreo a baha leve den sèptèmber. Despues di orkan Irma, frekuensia di tráfiko aéreo a bolbe subi den e di kuater kuartal te riba e nivel di un aña anterior. Den e di kuater kuartal di 2017 e kantidat di moveshonnan tabata mas di 19 porshento mas haltu ku den e mes kuartal den 2016.
Bahada di transporte di pasahero
Ounke e kantidat total di moveshonnan aéreo for di, i pa Hulanda Karibense a oumentá, e kantidat di pasahero den 2017 a baha ku mas di 6 porshento. Den 2017 a ehekutá mas buelo sin, òf ku un kantidat abou di pasahero kompará ku 2016.
E bahada mas grandi di pasahero yegando i saliendo tabata na Saba. Den 2017 kasi 26,6 mil pasahero a biaha for di, i pa e isla, un bahada di kasi 13 porshento kompará ku un aña anterior. Aeropuerto Flamingo na Boneiru tabatin ku atendé 323,1 mil pasahero, mas di 5 porshento ménos ku den 2016. Avionnan ku a bula for di, i pa Sint Eustatius, a transportá 37,8 mil pasahero, un bahada di kasi 11 porshento kompará ku 2016.
Ménos pasahero
Den 2017 kasi 7 porshento ménos pasahero a sali for di e aeropuertonan internashonal di Hulanda Karibense kompará ku un aña anterior. E kantidat di pasahero ku a yega a baha ku 6 porshento. En total e tres aeropuertonan a risibí 194 mil pasahero i a mira un tiki ménos biahero sali, 193 mil. E aeropuerto boneriano a mira mas di 162 mil pasahero yega i 161 mil biahero sali. Na e aeropuertonan di Sint Eustatius i Saba a risibí respektivamente 19 mil i 13 mil pasahero. E dos aeropuertonan mas chikitu aki a mira respektivamente 19 mil i 14 mil biahero sali.
Kwartaalmonitor Aviashon di kuater kuartal 2017 (na hulandes)
https://www.cbs.nl/nl-nl/achtergrond/2018/13/kwartaalmonitor-luchtvaart-vierde-kwartaal-2017
StatLine Aviashon Hulanda Karibense (na hulandes)
http://statline.cbs.nl/Statweb/publication/?DM=SLNL&PA=82332NED&D1=a&D2=a&D3=71,75,79,83-84,88,92,96,100-101&VW=T