Den 2017 habitantenan di Boneiru a sinti nan mes mas seif ku den 2013. Mas ku 80 porshento di e habitantenan a indiká ku nunka nan a sinti nan mes insigur aña pasá. Den 2013 esei tabata ainda 67,4 porshento. E habitantenan a duna siguridat den nan propio besindario un 7,7 komo sifra di rapòrt. Kuater aña anterior esei tabata 7,3. Esei ta sali na kla for di e asina yamá ‘Omnibusenquête Caribisch Nederland’ ku CBS a tene na Boneiru na 2017.
Mas ku 40 porshento di e habitantenan di Boneiru tabata di opinion den 2017 ku no tabatin kriminalidat den nan mes besindario, mes tantu habitante a raportá tiki kriminalidat. Di otro banda 6 porshento di e habitantenan sí a haña ku tabatin hopi kriminalidat den nan propio besindario. Esei ta komparabel ku 2013. Habitantenan di Boneiru ménos frekuente a duna di konosé ku kriminalidat ta sosodé den nan mes besindario, kompará ku habitantenan di Hulanda Oropeo. Den 2017, 19 porshento di hulandesnan oropeo a bisa ku no sa tin kriminalidat den nan mes besindario, 64 porshento a raportá tiki kriminalidat i 9 porshento a raportá hopi kriminalidat.
Ora ku a puntra habitantenan di Boneiru si kriminalidat den nan bario a oumentá, baha òf a keda igual aña pasá, mayoria hende a kontestá ku esaki a keda igual.
Gran mayoria ta raportá molèster den besindario
Den 2017, 70 porshento di e habitantenan di Boneiru a raportá molèster den nan mes besindario. Esei ta mas abou ku na Hulanda Oropeo (93 porshento). Habitantenan di Boneiru a menshoná mas bia molèster di tráfiko. Mas di mitar di e isleñonan a raportá e tipo di molèster aki aña pasá den nan besindario, partikularmente korementu di vehíkulo muchu duru. Kasi 40 porshento di e habitantenan tabata tin molèster di dekadensia físiko manera pupu di bestia i potoshi riba kaya, mobilario di kaya distruí i/òf muraya- òf edifisionan sushá.
Ménos di 30 porshento di e habitantenan di Boneiru a señalá molèster sosial den nan besindario, manera hende burachi òf hóbennan ku ta slènter riba kaya. Na Hulanda Oropeo ta señalá molèster di tráfiko, dekadensia físiko i molèster sosial mas bia ku na Boneiru.
Kantidat di molèster raportá a baha den 2017 kompará ku 2013
E kantidat di siudadanonan di Boneiru ku den 2017 a raportá molèster den nan bario ta mas abou ku den 2013. Na 2013 kasi 80 porshento a duna di konosé ku molèster den besindario tabata un problema masha komun. A indiká den 2017 mes tantu bia molèster di tráfiko. Dekadensia físiko i molèster sosial a wòrdu raportá ménos frekuente.
Mas ku un terser parti di habitantenan di Boneiru ta indiká ku nan mes ta eksperensiá molèster
A puntra e habitantenan ku a indiká ku tin molèster den besindario, den ki grado nan mes a eksperensiá molèster di esaki. E habitantenan di Boneiru a indiká den 35 porshento di e kasonan den 2017 ku nan a eksperensiá hopi molèster den besindario. Mas ku un kuart di e habitantenan a bisa ku nan tabatin hopi molèster di tráfiko, mas ku 10 porshento a indiká ku nan a eksperensiá molèster di dekadensia físiko i 7 porshento a duna di konosé ku nan a eksperensiá molèster sosial. Esaki ta komparabel ku e molèster eksperensiá den 2013. Na Hulanda Oropeo mas hende a eksperensiá molèster den besindario ku na Boneiru, esta 44 porshento.
Kasi mitar di habitantenan di Boneiru no ta satisfecho ku gobièrnu
Di e habitantenan di Boneiru 46 porshento a duna di konosé ku nan no ta satisfecho ku funshonamentu di gobièrnu ora ta trata e forma kon ta atendé ku kalidat di bida i siguridat. 17 porshento di e habitantenan a bisa ku nan sí ta satisfecho al respekto.
Tokante funshonamentu di polis e habitantenan di e isla tabata mas positivo. 43 porshento tabata satisfecho ku esei, 17 porshento no tabata satisfecho. Di e habitantenan 42 porshento tabata di opinion ku polis ta kombatí kriminalidat ku éksito, i 22 porshento no tabata di akuerdo ku e ponensia aki.
Kasi 60 porshento tabata di akuerdo ku e ponensia ku polis na Boneiru lo hasi lo máksimo pa yudabo, ora ku esei ta realmente importante. 14 porshento no tabata di akuerdo ku esaki.
Na Sint Eustatius i Saba ta hasiendo e Omnibusenquête na e momentunan aki. Mas lat den e aña aki lo publiká e resultadonan di e persepshon di siguridat na Sint Eustatius i Saba.
Fuente:
Maatwerk:
Oordeel politie overheid criminaliteit Bonaire 2017
https://www.cbs.nl/nl-nl/maatwerk/2018/11/oordeel-politie-overheid-criminaliteit-bonaire-2017
Statline:
Caribisch Nederland; overlast in buurt, persoonskenmerken:
https://opendata.cbs.nl/statline/#/CBS/nl/dataset/82557NED&D1=0,5,10,14-16&D2=0&D3=0&D4=a&D5=a&HD=180308-1004&HDR=T,G4&STB=G3,G1,G2
Caribisch Nederland; slachtofferschap criminaliteit, persoonskenmerken:
https://opendata.cbs.nl/statline/#/CBS/nl/dataset/82559NED&D1=a&D2=0&D3=0&D4=a&D5=a&HD=180308-1000&HDR=T,G4&STB=G3,G1,G2
Caribisch Nederland; (on)veiligheidsbeleving, persoonskenmerken:
https://opendata.cbs.nl/statline/#/CBS/nl/dataset/82558NED&D1=a&D2=0&D3=0&D4=a&D5=a&HD=180308-1004&HDR=T,G4&STB=G3,G1,G2
Splikashon:
Teksto den e lenk: diestres tipo di molèster
A puntra esnan ku a kontestá e enkuesta pa loke ta trata 13 tipo di molèster si esakinan sa sosodé den nan mes besindario. Si ta asina, a puntra despues den ki grado nan mes ta eksperensiá molèster di esakinan: hopi, un tiki òf no tin molèster.
Ta trata di e siguiente formanan di molèster:
1. Potoshi riba kaya;
2. Mobilario di kaya distruí, manera baki di sushi, banki òf hòki pa warda riba konvoi;
3. Muraya- òf edifisionan sushá;
4. Pupu di bestia riba asera òf riba kaya;
5. Korementu muchu duru;
6. Problemanan di parker, por ehèmpel vehíkulonan ku ta parker robes òf muchu beheit;
7. Komportashon agresivo den tráfiko;
8. Hende burachi riba kaya;
9. Uso òf bendementu di droga, por ehèmpel riba kaya òf den coffeeshop;
10. Molèster di negoshinan di hóreka manera bar, restorant òf snèk;
11. Molèster di parti di habitantenan di bario;
12. Hendenan ku ta ser molestiá riba riba kaya;
13. Hóbennan ku ta slènter rònt.
Dekadensia físiko ta enserá e siguiente tiponan di molèster:
1. Potoshi riba kaya;
2. Mobilario di kaya destruí, manera baki di sushi, banki, òf hòki pa warda riba konvoi;
3. Muraya- òf edifisionan sushá;
4. Pupu di bestia riba asera òf riba kaya.
Molèster sosial ta enserá e siguiente tiponan di molèster:
1. Hende burachi riba kaya;
2. Uso òf bendementu di droga, por ehèmpel riba kaya òf den coffeeshop;
3. Hendenan ku ta ser molestiá riba kaya;
4. Hóbennan ku ta slènter rònt.
Molèster di tráfiko ta enserá e siguiente tiponan di molèster:
1. Korementu muchu duru;
2. Problemanan di parker, por ehèmpel vehíkulonan ku nan ta parker robes òf muchu beheit;
3. Komportashon agresivo den tráfiko.
Demas molèster ta enserá e siguiente tiponan di molèster:
1. Molèster di negoshinan di hóreka manera bar-, restorant- òf snèknan;
2. Molèster di parti di habitantenan di bario.