Korte Promé Instante na Sint Maarten ta bai trata 6 i 7 di febrüari 2018 kaso “Emerald”. Ta trata di un kaso kontra doño di 7 empresa ku ta ser sospecha di evadí impuesto di entrada di benta.
E sospechonan a resultá durante investigashon “Emerald”, un investigashon di TBO (Team Bestrijding Ondermijning) relashoná ku posibel froude i korupshon den haf di Sint Maarten. A bin sali na kla ku empresanan ku ta ser sospecha, a paga (spesífikamente) den aña nan 2012-2016 alrededor di 8 mion dollar pa trabounan den haf. Di e trabounan aki e empresanan no a hasi menshon na Servisio di Belasting, esei ta kastigabel.
Ademas for di e investigashon a bin sali na kla ku e trabounan pa kua e empresanan a ser paga dor di haf, nunka no a ser ehekutá, pero ku a traha ku faktura falsifiká. E kompanianan ku a haña dagvaarding no lo ser persiguí pa esaki, pero e konteksto froudulento aki ta resultá ku aki no por papia mas di evashon simpel di belasting.
Entre e sospechosonan ku a risibí un dagvaarding, tin entre otro un miembro di Parlamento di Sint Maarten i un agente polisial.
Un gran parti di e fakturanan paga tabata pa trabounan di limpiesa (schoonmaak en opruimwerkzaamheden). TBO, despues di orkan Irma, ta hopi atento riba korupshon i señal di froude. Manera konosí, Gobièrnu di Ulanda a pone 7 mion Euro disponibel pa trabounan di limpiesa despues di Irma. E fondonan aki ta ser repartí pa e instansia UNDP. Ministerio Públiko ke, pa medio di e kasonan penal, duna un señal ku froude i korupshon lo no keda tolerá. Den investigashon “Emerald” ta preparando e kaso kontra e sospechosonan mayó, esta M.M., CEO di e kompania di haf di Sint Maarten i O.A., doño di un kompania di seguridat ku ta enkargá ku seguridat den haf. Den kuadro di esaki ta skuchando aktualmente testigunan serka Wes-komisario. Di akuerdo ku kalkulashon di Servisio di Belasting, pais Sint Maarten a pèrdè mas ku 6 mion florin (Antiano) na entrada di Belasting.