Ministerio Públiko (OM) di Kòrsou ta inisiá den kaso “Babel” ku un demanda di kita propiedat (ontnemingsvordering) kontra Gerrit Schotte (Kòrsou, 1974) i Cicely van der Dijs (Kòrsou, 1978). Ta trata di un proseso pa rekobrá plaka ku Schotte i Van der Dijs a akumulá inhustamente, esta e asina yamá „ontnemen van wederrechtelijk verkregen voordeel‟.
Korte den Promé Instante di Kòrsou a duna sentensia dia 11 di mart 2016 den kaso “Babel”. Schotte a keda sentensiá pa entre otro akseptá soborno di mas ku USD 200.000 i falsifikashon di dokumento. Schotte i van der Dijs ámbos a keda sentensiá pa konhuntamente labamentu di plaka di e fondonan soborná. Wes a dikta veredikto den e kaso aki di respektivamente 3 aña i 15 luna, si kual 6luna kondishonal. Banda di e kastigunan aki tambe Schotte a pèrdè e derechi di pone su mes elegibel pa elekshon durante 5 aña.
Den e kaso kontra sr. Schotte lo pidi Korte den Promé Instante pago bek di 1.861.692 florin. Den e montante aki tin tambe inkluí un pago di USD 800.000 ku segun OM a keda hasi na Schotte riba un kuenta bankario na Suisa riba un kuenta di un kompania establesé riba Marshall Islands den kual Schotte tabata esun benefisiá. Den e kaso di sra. Van der Dijs ta bai eksihí e montante di 205.274 florin. Esaki ta e montante ku segun OM den e kaso aki a benefisiá sra. Van der Dijs personalmente.
E kaso lo inisiá dia 15 di febrüari 2018 komo „regiezitting‟, ku ta nifiká ku defensa ta haña e oportunidat pa pidi pa mas investigashon.