Atenshon polítikonan pa BonKompra deseabel
Dia 8 di yanuari último Unkobon a publiká e “hand-out” ku nan a entregá e miembronan di Eerste y Tweede Kamer di Hulanda ku tabata di bishita. Den e “hand-out” aki, Unkobon a pidi pa buta atenshon èkstra riba e posponementu di e subsidio palabrá riba e tarifanan fiho di awa y elektrisidat aki na Boneiru. E posponementu aki ta e kousa prinsipal ku e tarifa pa koriente pa 1 di yanuari 2018 a keda oumentá ku 24%.
Dia 16 di yanuari último Konseho Insular, den un moshon, a pidi Kolegio Ehekutivo pa tuma e medidanan nesesario pa suavisá e impakto negativo ku e oumento di awa y elektrisidat entrante 1 di aprel 2018 lo bai kousa. A instruí Kolegio Ehekutivo pa pidi Den Haag, mas pronto ku ta posibel, e subsidio riba awa y elektrisidat. Tambe Kolegio Ehekutivo mester inisiá, dos siman promé ku e oumento den aprel tuma lugá, ku un kampaña pa konsientisá e konsumidó kon anda ku awa y koriente ekonómikamente.
Tambe Konseho Insular ta konsiderá pa gobièrnu ku koperashon di Tienda pa Konsumidó y Unkobon intensivá e kontrol di preis riba produktonan di primera nesesidat.
Unkobon ta pleitando ya pa un aña y mei pa bin ku medidanan pa suavisá e impakto negativo ku e oumento di awa y elektrisidat lo bai trese ku né.
Den kuadro pa, huntu ku Tienda pa Konsumidó, yega na un komparashon di e preisnan den e diferente supermerkadonan, Unkobon a entregá fin di november 2017 un plan di proyekto na e Ministerio di Asuntonan Ekonómiko pa finansiamentu.
Den luna di yanuari Unkobon lo inisiá un kampaña di informashon riba su página di facebook (fb.com/Unkobon) unda lo duna tep kon spar riba koriente.
Unkobon ta mira e moshon di Konseho Insular di dia 16 di yanuari 2018 komo un sosten di su inisiativanan. Unkobon ta haña deseabel ku polítikonan mustra atenshon y interes pa renobá e palabrashon di aña 2014 en torno di Bon Kompra. Danki na e palabrashon aki e preis pa e pakéte di 36 produkto na e supermerkadonan den bario ku a partisipá, a keda mesun abou ku e supermerkadonan grandi na Kaya Industria. E produktonan aki ta tin un promedio di 20% mas barata. E palabrashon aki tabata bálido pa solamente 6 luna.