Awe direktor di RCN a logra un resultado di negoshashon ku sindikatonan riba un Kontrato Kolektivo (CAO) pa empleadonan di gobièrnu di Reino na Hulanda Karibense pa un periodo di tres aña.
Ku e resultadonan di negoshashon aki lo tin un subida di salario supstansial di 3,75% pa tur empleado di gobièrnu di Reino den e añanan binidero.
Banda di esei un deseo di basta tempu di e sindikatonan pa yega na un asina yamá ‘dertiende maand’ gradualmente ta keda realisá. Ku e resultadonan di negoshashon aki tur empleado públiko di gobièrnu di Reino gradualmente lo risibí un bono di fin di aña di 7% na 2020, enbes di e bono nominal di fin di aña aktual di USD 1250.
Banda di esei e suma minimal lo subi te na USD 1500 kompará ku e bono di fin di aña aktual, pa asina tur empleado di gobièrnu di Reino di Hulanda Karibense por sinti un subida.
Awor e sindikatonan ta bai konsultá ku nan miembronan tokante e resultado di e negosiashonnan.