Maneho di posponementu ta kondusí na subida di preis di koriente ku 24%

Entrante 1 di yanuari 2018 WEB ta bai oumentá temporalmente e tarifa pa koriente ku no menos ku 24%. E oumento aki lo ta pa tres luna. Despues lo bin ku un sistema nobo kon yega na stipulá tarifa di awa y elektrisidat. E konsekuensianan pa e konsumidó ainda no ta kompletamente bisto.  E sistema nobo aki ta ankrá den e ley “wet electriciteit en drinkwater BES” ku a drenta na vigor na aña 2016. E  ley aki ta buta e.o. ku no solamente WEB y e kolegio ehekutivo di OLB tin un papel den stipulamentu di tarifa pa awa y elektrisidat, sino tambe ACM (Autoriteit Consument & Markt), e ministerio di Asuntonan Ekonómiko y e ministerio di Infrastruktura y Waterstaat.
E sistema  nobo, pa loke ta trata tarifa pa konsumidó, mester a tuma lugá for di 1 di yanuari 2017 pero medio desember 2017 esaki a keda posponé, pa di tres biaha, té 1 di aprel 2018.
E oumento temporal di tarifa pa koriente, ku a keda anunsiá pa WEB, ta relashoná ku un oumento drástiko di e gastunan di produkshon di Contour Global y kual for di 1 di yanuari 2018 por wordu butá riba kuenta di WEB. Tambe e gastunan di produkshon di koriente, ku WEB mes ta produsí,  ta motibu pa e oumento temporal aki.
Durante di 2017 ya tabata konosí ku e gastunan haltu tabata hustifiká oumento di e tarifanan. Apesar di esaki, no a adaptá e tarifanan pa ku e usuarionan den 2017. Pa UNKOBON ta inkomprendibel di kon e instanshanan konserní no a adaptá e prèis pa koriente for di   den 2017. Si e oumento aki a tuma lugá na tempu den 2017, manera a sosodé na Saba y Statia, unda lo a keda inkorporá subsidio primintí pa Hulanda, lo a prevení e gòlpi ku e oumento temporal na inisio di yanuari 2018 lo bai trese ku né pa e konsumidónan.
Pa mas informashon tokante e tarifanan di produkshon bai riba FB.com/Unkobon