Fundashon Tienda pa Konsumidó, den 2017, a haña na hopi supermerkado produktonan kaduká. Hopi konsumidó no sa nifikashon èksakto di e “fecha di vensementu” ku tin notá riba e produktonan. Komo tal nos ta duna a kontinuashon un konseho I un splikashon.
Konseho:
Unkobon ta avisá tur konsumidó pa paga bon tinu riba e fecha di vensementu ku tin pará riba e produktonan ku nan ta bai kumpra.
Si riba un produkto tin notá “TGT” (te gebruiken tot ) òf “use by”, esaki ke men “usa promé ku”. Si esaki wòrdu konsumí despues di e fecha ei, e lo por ta dañino pa bo salú. E produktonan aki sigur no mester wòrdu kumprá si e fecha a vense.
Si riba un produkto tin notá “THT” (tenminste houdbaar tot)òf “BB” (best before) esaki ke men “bon tè”. E produkto aki por wòrdu konsumí despues di e fecha ei. E chèns di bira malu ta minimal. E chèns ta, ku e sabor di e produkto ta menos bon.
Si tin un ofèrta riba produktonan ku anotashon di “THT” òf “BB” (bon tè ) y ku e fecha ta kasi di bai vense, no laga e para. Paga bon tinu riba produktonan den bléki. Si e bléki ta frus of doblá no kumpra. Ofèrta riba produktonan ku anotashon di “THT” òf “BB” ku ta serka di vense, no laga e para. Si e a vense hopi tempu pasa, no kumpra.
Fecha di vensementu y fecha di uso:
Tin dos manera pa splika algu tokante e fecha di vensementu di un produkto.
Na unda ta indiká “THT” òf “BB” (bon té) e fabrikante òf e importadó ta garantisá e kalidat di e produkto tè ku e fecha ei, kon tal e konsumidó sigui e instrukshon kon warda e produkto aki. Si e fecha a kaduká, e komersiante ta permití pa bende esaki basta e no ta malu. Despues ku a habri e produkto en kestion, mester konsumí’é mesora.
Riba komestibelnan ku ta daña lihé , ta obligá pa menshoná un fecha té riba kual e por wordu usá. Den e kaso aki tin notá “TGT” òf “use by” (usa promé ku). Promé ku e fecha menshoná aki, por konsumí e produkto en kestion sin peliger pa bo salú, basta e produkto a wòrdu bon wardá.
Riba algun komestibel, manera e.o. bals, bebida ku mas ku 10% di alkohol, salu di kushina y pan, ku ta wordu konsumí dentro di 24 ora despues ku esaki a wordu produsí, no ta obligá pa menshoná un fecha di vensementu.
Tip kon warda bo komestibelnan:
• Si e fecha di vensementu di un produkto ta dependé kon esaki mester wòrdu wardá, mester tin un aviso kon esaki mester wòrdu wardá.
• Si e produkto mester wòrdu wardá den frieu e temperatura mester ta di 7°C. Ta konsehá pa e temperatura di e eiskast ta 4°C.
• Buta e produktonan ku ta wòrdu usá promé dilanti den kashi of den eiskast.
• Vrís tur. Hasta késhi por wòrdu di vrís.
• Limitá stòk di bo komestibelnan