Den kurso di siman pasá i e siman aki diferente material di konstrukshon a yega Saba. E materialnan ta destiná pa hasi reparashon na kasnan ku ta destruí òf ku a risibí daño severo dor di orkannan Irma i Maria. Banda di palu, metal, zim i generator e karga ta konsistí tambe di wasmashin-, kama- i frishidèrnan. Kolegio Ehekutivo di e Entidat Públiko ta enkargá ku repartishon di e materialnan.
Ministerio di Asuntunan Interno i Relashon di Reino, responsabel pa yudansa di emergensia i rekonstrukshon di Islanan Ariba Sint Maarten, Saba i Sint Eustatius, a supsidiá e materialnan di konstrukshon. A realisá esaki den estrecho kolaborashon ku Entidat Públiko Saba.
Riba djabièrnè 17 di novèmber e Unidat SZW di RCN a inisiá e repartishon di artíkulonan duradero na famianan ku a keda afektá direktamente dor di e orkannan. Pa ousiliá persona- i famianan SZW a subi e kriteria pa un entrada mínimo te ku un i mei biaha e suèldu mínimo. Tambe a amplia e lista di artíkulonan duradero i awor ta konsistí di sètnan di komedor, sètnan di sala, klechi i kusinchi pa famianan ku a pèrdè tur kos. Dor di e adaptashon aki mas persona na Saba i Sint Eustatius por bini na remarke pa ayudo di emergensia. E prosedura di petishon ta klousurá riba 31 di desèmber.