Riba 18 di òktober KPCN, OLB i Inspekshon di Labor a duna informashon na estranheronan ku ta traha den Hulanda Karibense. E suministro di informashon akí a tuma lugá den kuadro di kombatimentu di trafikashon di hende i eksplotashon laboral. Agentenan polisial i inspektornan di OLB i Inspekshon di Labor a hiba kombersashonnan ku estranheronan tokante nan derechonan ora ta trata di suèldu i tempu di trabou i tokante otro derecho- i obligashonnan. En total a bishitá 29 sitio i a duna informashon na 114 estranhero.
En konekshon ku esaki e estranheronan a haña un ‘flyer’ i un foyeto den kua ta splika tur kos na un manera simpel i ku nan por bolbe pasa den dje despues. A publiká e foyetonan den kuater idioma i por buska nan grátis na Unit di SZW.
E suministro di informashon a enfoká riba komersio por detal, personanan ku ta hasi trabou di kas i konstrukshon. Ounke intenshon di e akshon tabata pa duna informashon, a topa tambe ku algun situashon ku ta rekerí mas investigashon. E partidonan embolbí lo investigá esakinan mas a fondo. Mas aleu e estranheronan a duna di konosé na e inspektor- i otro kontroladónan ku e informashon tabata mas ku bonbiní. A base di e siñal akí Inspekshon di Labor lo organisá na komienso di otro aña anochinan di informashon pa tur estranhero ku ta traha den Hulanda Karibense.
E inisiativa ta prosedente di e grupo di trabou Trafikashon i Eksplotashon di hende ku ta konsistí di partnernan di kadena manera Polis (reshèrshi i Ofisina pa Ayudo na víktima), IND, Ministerio Públiko, Koninklijke Marechaussee, Voogdijraad, entidat públiko i Asuntunan Sosial i Empleo. Na yüni di e aña akí tur partner a firma e asina yamá ‘Convenant Themaregister’. Intenshon di e kombenio akí ta pa atendé efektivamente ku prevenshon i kombatimentu di trafikashon/eksplotashon di hende pa medio di kooperashon entre e diferente partnernan di kadena.