Riba 18 di òktober rònt mundu ta para ketu na trafikashon di hende. Den Hulanda Karibense esaki tambe ta e kaso. E palabra trafikashon di hende kisas ta kai pisá serka bo. Trafikashon di hende ta un violashon di derechonan humano. Den Hulanda Karibense tambe trafikashon di hende ta sosodé den forma di eksplotashon laboral. Marechaussee, Polis, entidatnan públiko, IND i Inspekshon di labor ta hasi èkstra esfuerso pa prevení esaki.
Riba di dia kontra trafikashon di hende e diferente gobièrnunan ta sali huntu pa duna estranheronan informashon tokante nan derecho- i obligashonnan. Pa e motibu akí a traha un foyeto speshal. Informashon ta e base pa kombatí trafikashon di hende i eksplotashon laboral. Ta informá doñonan di trabou tambe.
Hopi hende ku ta haña nan mes konfrontá ku trafikashon di hende òf eksplotashon laboral no ta ripará hopi bes ku nan ta víktima. E situashon asina hopi bes no ta surgi di un dia pa otro. Na momentu ku un estranhero disidí di biaha for di su pais di orígen pa eksterior hopi bes ta duna nan espektativanan bunita pero den práktika ta resultá ku esakinan hopi bes no ta ser realisá. Lástimamente sa sosodé ku un estranhero ta risibí ménos pago ku e tin derecho riba dje. Tin bes den kombinashon ku esei ta traha masha hopi ora òf ta menasá estranheronan ku revokashon di nan pèrmit di trabou. Otro señalnan ta: no ta kumpli ku promesanan, nan no por disponé di nan propio pasport i/òf mester hasi un debe grandi serka e dunadó di trabou. Den tur esei, hulandesnan tambe por bira víktima di trafikashon di hende.
Un di e formanan hopi komun di trafikashon di hende den mundu ta ku mester hasi aktonan seksual bou di preshon òf riba òrdu. Ta trata den e kaso ei hopi bes di trafikashon di hende muhé i prostitushon ilegal. Intenshon di e dia kontra trafikashon di hende ta tambe pa embolbí un i tur den kombatimentu di tipo di situashonnan humiliante asina.
Bo ayudo i estado di alerta ta di importansia. Tur e gobièrnunan ta hasi un yamada riba poblashon pa mèldu situashonnan asina.
Bo por tuma kontakto pa esaki ku polis (KPCN).
Por yama e siguiente numbernan di telefòn di KPCN na tur momentu:
• Na Boneiru: 717-8000 (general). Number di tep anónimo na sekshon di Info na Boneiru: 717- 7251
• Na Saba: 00599 – 4173737
• Na Sint Eustatius: Kuido di polis básiko (Basis politiezorg): 00599-318-2333
Ta atendé bo denunsia ku konfidensialidat!