Siman pasa a informá organisashonnan sosial na Saba, Boneiru i Sint Eustatius durante seshonnan di informashon tokante di e areglo di supsidio “Oportunidat pa tur mucha”. For di 2017 te ku 2021 ta pone 1 mion euro èkstra disponibel. Ku komo meta pa duna tur mucha entre 0 i 17 aña ku ta lanta den pobresa na Boneiru, Sint Eustatius i Saba, e oportunidat pa nan tambe por partisipá. E seshonnan tabata bon bishita i a hasi hopi pregunta.
Durante e enkuentro diputado di e islanan tambe a hiba diskurso. Diputado di Boneiru, Nina den Heyer, tabata kontentu di mira un sala yená ku hende ku tin kurason pa mucha. Den su mensahe e la trese pa dilanti kon importante ta pa traha huntu pa por alkansá mas tantu mucha posibel ku tin mester di dje. Diputado Rolando Wilson di Saba a dirigí su mes na e organisashonnan sosial i a pone énfasis ku pa Saba ta di importansia pa pone e prioridatnan korekto i pa traha huntu mas tantu posibel pa por yuda e gruponan di enfoke. Perla Duinkerk a papia na number di diputado Derrick Simmons i a bisa ku Sint Eustatius ta kontentu ku e medionan èkstra “ Den e kuadro di derecho di mucha ta importante pa tur mucha por partisipá. Esaki ta duna Statia e chèns pa por yuda e grupo di muchanan aki”.
E repartishon di e 1 mion euro tur aña ta € 550.000 pa Boneiru, € 250.000 pa Sint Eustatius i € 200.000 pa Saba. A determiná e repartishon di e manera aki: a parti mitar di e 1 mion euro igualmente pa e islanan, e sobrá proporshonalmente segun e kantidat di mucha.
Bo por entregá un petishon pa un mínimo di € 10.000 i un máksimo € 50.000. Organisashonnan por entregá mas petishon; e suma total di e petishonnan huntu por ta maksimal € 100.000. Bo por entregá bo petishon na USD.
Por entrega petishon via e adrès di e-mail ka**********************@mi****.nl for di 29 de mei 2017, 9.00 or di mainta ,ora lokal, te ku 12 di yüni 2017, 5’or di atardi ora lokal i lo trata e petishonnan segun sekuensia di entrada, basta ku nan ta kompleto. No por prosesá petishonnan ku a entregá pafó di e temporada aki. Paga tinu: esaki ta nifiká ku tampoko lo no por entregá promé ku 29 di mei 9.00 or di mainta! Por ‘download’ e formulario di petishon diseñá pa esaki riba www.rijksdienstcn/socialezakenenwerkgelegenheid.