Resientemente a yega e punto mas haltu den rekonstrukshon di e salanan di gemnastik di Komunidat di Skol Boneiru (SGB) na Kaya Frater Odulfinus.
Señora den Heyer (diputado di enseñansa), señor Oleana (kabes di departamento RCN/OCW) i señor van Efferink (direktor di SGB) konhuntamente a pone e bandera den nòk di e sala di gemnastik nobo.
Pa motibu di mal estado di e konstrukshon, tabata nesesario pa rekonstruí e espasionan pa deporte. A basha e dos salanan abou te na nivel di e flur i a lanta nan di nobo. Ta renobá kompletamente e espasionan pa kambia paña. Lo ventilá e salanan nobo di forma natural. Esei kier men ku no ta pone èrko, pero ku a diseñá e edifisio di tal forma ku bientu por bai ku e kalor. Pa un mihó akústika a prosesá material ku ta apsorbé zonido den e salanan.
Ta ferwagt ku lo entregá e espasionan pa deporte renobá medio novèmber 2017. E skol mes lo atendé ku mehorashon di e kanchanan di deporte pafó. Pa esaki ta buskando spònser.
E proyekto akí pa SGB ta parti di e plan di alohamentu pa enseñansa na Boneiru, finansiá konhuntamente pa entidat públiko Boneiru (OLB) i ministerio di Enseñansa, Kultura i Siensia (OCW). Rijksvastgoedbedrijf ta koordiná ehekushon di e diferente proyektonan ku ta forma parti di e plan akí na nòmber di OLB i OCW.
Pa rekonstrukshon di e salanan di gemnastik di SGB ta traha huntu ku e kompania di konstrukshon Bonned Haafkes VOF i e diseño ta di Streefkerk Architects & Consultants den kooperashon ku DMV Architecten.