Ku un momentu di sakamentu di pòtrèt konhuntamente banda di e bòrchi di konstrukshon, dia 26 di aprel a duna inisio ofishal na ehekushon di e proyekto di konstrukshon “Ampliashon Liseo Boneriano” den e bario Hato na Boneiru.
E aktual kompleho di skol na Kaya Amsterdam, Boneiru, ta konsistí na e momentunan akí di dos segmento i un plenchi. Ta bai amplia esaki awor ku dos segmento mas i un parti interior bou di dak. Segun plan lo tuma e segmentonan nobo na komienso di e aña eskolar 2018/2019 den uso. Despues ku finalisá e segmentonan nobo por alohá tur e añanan di estudio di MAVO, HAVO i VWO na un sitio na Kaya Korona. E sekshonnan vmbo, mbo i PrO di Komunidat di Skol Boneiru ta keda alohá na Kaya Korona. E kontratista kontratá a kuminsá kaba ku e promé trabounan. Por mira un impreshon tridimensional di e diseño riba e wèpsait di e arkitekto, www.atelierpro/nl, bou di proyektonan.
Realisashon di e proyekto di konstrukshon ta parti di e plan di alohamentu di enseñansa pa Boneiru, finansiá konhuntamente pa entidat públiko Boneiru i ministerio di Enseñansa, Kultura i Siensia (OCW). Rijksvastgoedbedrijf ta koordiná ehekushon di e diferente proyektonan ku ta forma parti di e plan akí na nòmber di entidat públiko Boneiru i OCW.
E diseño ta di e kombinashon di arkitekto Jacobs Architekten di Boneiru i Atelier PRO di Hulanda. Konstrukshon di e ampliashon di Liseo Boneriano ta den man di e kontratista VOF BonNed – Haafkes na Boneiru, bou di direkshon di Jacobs Architekten.
Esaki entretantu ta e di dos proyekto di alohamentu di enseñansa pa SGB; anteriormente, na desèmber 2016, a inisiá ku rekonstrukshon di e salanan di gemnastik na Kaya Korona. Otro proyektonan di alohamentu ku tin planiá pa SGB ta renovashon/konstrukshon pa e sekshonnan di vmbo, mbo i PrO na Kaya Korona.
Proyektonan di alohamentu di enseñansa ku a keda realisá anteriormente na Boneiru ta renovashon di Kolegio San Bernardo na 2014, konstrukshon di Kolegio Strea Briante (ántes Skol Watapana) i konstrukshon di Skol Amplio Papa Cornes.