E Wet arbeid vreemdelingen BES (Wav BES) su meta ta pa protehá e merkado laboral lokal i pa evitá kompetensia deshonesto entre kompanianan i riba e kondishonnan laboral. Entrante promé di aprel e reglanan di maneho pa e pèrmit di trabou (TWV) a wòrdu hasi mas skèrpi. E reglanan di maneho mas skèrpi tin komo meta pa garantisá klaridat i uniformidat den e maneho di ehekushon pero ta sirbi tambe pa tene kuenta ku mas reglanan den e ehekushon di e kompetensianan ku ta inkorporá den e Wav BES i den e Besluit uitvoering Wet arbeid vreemdelingen BES (BuWavBes)
Regla prinsipal den e evaluashon di un petishon pa un pèrmit di trabou ta ku ta chèk si tin oferta lokal pa e vakatura en kuestion, e asina yamá prueba di merkado laboral. Den práktika esaki ta nifiká ku e departamento TWV ta bai kontrolá mas skèrpi si e doño di trabou a hasi sufisiente esfuerso pa haña trahadónan lokal. Tambe ta wòrdu kontrolá si e vakatura a wòrdu registrá serka e Entidat Públiko. Komo kiera ku un pèrmit di trabou pa trahadónan di pafó di e entidatnan públiko Boneiru, SintEustatius i Saba ta wòrdu otorgá solamente ora no tin oferta lokal, trahadónan lokal asina ta haña e chèns pa bai traha i gana na mes pan di kada dia.
Otro eksigensianan ku e reglanan di maneho mas skèrpi ta preskribí na doñonan di trabou ta ku mester paga un suèldu konforme merkado i por lo ménos e suèldu mínimo na e trahadó estranhero. Tambe ta nesesario ku e doño di trabou ta regla alohamentu. Mas aleu e trahadó mester tin un pèrmit di estadia i mester ta entre 18 i 45 aña di edat.
Ta importante tambe ku doñonan di trabou ta kuminsá na tempu ku e prosedura di petishon pa un TWV. Si nan ke un pèrmit di trabou na tempu, e ora ei ta nesesario pa kuminsá 3 pa 4 luna delantá, promé ku e trahadó ta kuminsá òf ku e pèrmit di trabou ta terminá. E trahadó estranhero por traha solamente ora e pèrmit di trabou a wòrdu otorgá. Durante e petishon e no por traha.
Durante di e reunionnan di informashon na Saba, SintEustatius i Boneiru e doñonan di trabou a haña e oportunidat pa buska informashon i pa haña bista riba e prosedura ku mester siguí i e kriterionan pa haña un pèrmit di trabou. E partisipantenan a risibí un skema di fluho den kua e prosedura di un petishon pa pèrmit ta wòrdu reprodusí skemátikamente i un diagram ku ta mustra e puntonan mas importante kaminda un TWV ta nesesario òf nò i e eksigensianan ku mester kumpli kune pa haña un TWV.
Bishitá www.rijksdienstcn.com/socialezaken pa mas informashon.