HBN Law a ser menshoná komo un di e mihó bufetenan di abogado di Karibe Hulandes den e publikashon Chambers Global 2017, di Chambers & Partners, ku na mes momento tambe a konsiderá dos abogado di e mesun bufete akí, Eric R. de Vries i Chris de Bres, entre e mihó abogadonan di Karibe Hulandes.
Chambers & Partners ta un organisashon internashonal ku ya pa 17 aña kaba ta identifiká i klasifiká e mihó bufete- i abogadonan den mas ku 180 hurisdikshon na mundu.
Chambers & Partners a deskribí HBN Law komo: “un di e bufetenan mas grandi i mihó establesí den Karibe Hulandes. Algu ku su klientenan ta apresiá mashá ta e profundidat di su ekspertisio. Su bon reputashon ta prinsipalmente den e area di resolushon di disputa. E bufete akí a yega di trata vários kaso grandi di arbitrahe ‘transfronteriso’ (ku partido den mas ku un teritorio) i di litigio ‘high-profile.’ E ta aktivo riba tereno di transakshon, i real estate i telecom tambe ta entre su areanan fuerte.”
Ademas, tokante e dos abogadonan top di e bufete, e organisashon tabatin lo siguiente di bisa:
“Eric R. de Vries ta un luchadó peso pisá den e area di litigio, ku un ekselente reputashon serka nos fuentenan. Su klientenan ta balorá prinsipalmente su kreatividat i fleksibilidat, i un di nan a deskribí Eric komo ‘un hende ku sa masha bon mes kon pensa ‘out of the box’ i bini ku solushon relativamente simpel pa problema ku na promé bista por parse bastante kompliká.’ Ademas e ta aktivo riba tereno di finansiamentu i M&A, i su koleganan di abogasia ta elogi’é pa e aserkamentu ‘business-minded’ ku e ta usa den su trabou.”
“Chris de Bres, ku ta traha for di Boneiru, ta ser rekomendá pa su trabou den e area di litigio. Entre su klientenan tin diferente banko internashonal i kompania di sektor di energia i di telecom. Nos fuentenan ta elogi’é pa e atenshon ku e tin pa detaye. Un di su klientenan a bisa: ‘E por a splika e aspektonan tékniko di nos kaso masha bon. E ta un gai hopi bibu i tabata hopi bon prepará pa nos oudiensia den korte.’”
Ya ta di shete aña ku Chambers & Partners ta menshoná Eric R. de Vries entre e mihó abogadonan di Karibe Hulandes, i pa Chris de Bres esaki ta su di dos aña.
Fundá na 1938, HBN Law tin 80 aña kaba komo e bufete lider den Karibe Hulandes.
Cu 35 abogado partí den su sinku ofisinanan na Aruba, Boneiru, Kòrsou, Sint Maarten i Amsterdam, HBN Law ta sirbi henter e Reinu Hulandes, inkluso Saba i Sint Eustatius for di su ofisina na Sint Maarten. For di su ofisina na Kòrsou, HBN Law ta sirbi Surnam tambe. Pa mas informashon tokante e bufete i su abogadonan, bishitá www.hbnlaw.com.