E Basis Opleiding Kustwacht (BOK) a bolbe reanudá djaluna último. Despues ku e training mester a stòp pa motibu di e krisis di COVID-19, dia 3 di ougùstùs 2020 e hóbennan i nan instruktornan a kuminsa atrobe. E 18 hóbennan di Aruba, Kòrsou i St. Maarten a start ku hopi entusiasmo i energia na un “hike” pa kana den e area di “de drie gebroeders”, esakinan ta e tres serunan den area di Veeris. E hóbennan a lanta for di trempan djaluna i nan a “hike durante henter mainta ku hopi solo i ku retonan den e tereno pa asina realisá e ehersisio aki. E simannan benidero e studiantenan lo sigui e módulonan di e BOK.
Henter e siman ku a pasa tabata den kuadro di un “opfriscursus” di e simannan di formashon ku nan a hasi den yanüari i febrüari 2020, na momentu ku e estudio a kuminsa. Durante di e simannan di entrenamentu di formashon e studiantenan a ser retá mentalmente i físikamente.
Bou di guia di instruktornan di Wardakosta e hòbennan a bívak den mondi, marcha kilometernan largu, landa, kushiná, kayak, traha flòt, sigui programa den klas i hasi ehersisionan anfibioso. Despues di e programa di formashon nan a risibí e estudio nóutiko kual ta enserá materianan manera: training basiko di salba bida, kombatimentu di kandela, guia di
marifoon i kurso di EHBO.
Na final di e siman di “opfriscursus” aki nan lo kontinuá ku e programa sigun e planning di BOK i lo sigui ku e materia di “schietbivak”.