Centrale Bank van Curaçao en Sint Maarten (CBCS) a konsehá e paisnan Kòrsou i Sint Maarten pa solisitá sosten di Ulanda a base di artíkulo 36 di Statuto di Reino pa finansiamentu di presupuesto di gobièrnu, finansiamentu pa mantené kupo di trabou i si ta nesesario pa finansiá e balansa di pago.
E reservanan di divisa ta wòrdu manehá pa CBCS ku mester pèrkurá pa semper tin sufisiente divisa pa transakshonnan ku eksterior por tuma lugá sin problema. Ku esaki ta mantené konfiansa den e tasa di kambio fiho di nos florin na e dòler merikano. Kontrali na algun sugerensia den media, reservanan di divisa no por wòrdu usa pa finansiamentu di e programanan di sosten.
E programanan di sosten di paisnan Kòrsou i Sint Maarten ta enfoká pa krea un espasio finansiero pa yuda siudadanonan i kompanianan afektá pe krísis di Covid-19 pa por kumpli ku nan nesesidatnan mínimo. Esaki por pone un preshon riba e reserva di divisa pa motibu di importashon.
Finansiamentu di e programanan di sosten for di eksterior, partikularmente Ulanda, ta kompensá e pèrdida di entrada di divisa. Promé ku a sera e fronteranan e kobertura di importashon tabata 3,8 luna. Esaki ta un kobertura konfortabel. Ku e promé pago di sosten di likides for di Ulanda, e kobertura di importashon temporalmente a surpasá 4 luna.
“CBCS ta komprometé pa mantené stabilidat di e tasa do kambio di florin di Antia Ulandes na e dòler merikano i lo hasi uso di tur instrumento nesesario, manera a hasi ku éksito den pasado”, segun presidente interino di CBCS, dr. Jardim. CBCS lo sigui traha na bienestar pa finansiá e ekonomia, miéntras e ta keda kumpli ku su tarea monetario primordial. E medida di CBCS di dia 20 di mart último ku no ta emití lisensianan di divisa pa transakshonnan di kapital ku por a trese un bahada den e reserva di divisa a korto plaso, ta keda na vigor pa e momentunan aki. Dependé di siguiente desaroyonan otro medidanan por sigui.
“CBCS lo asistí ámbos pais pa prepará un plan di rekuperashon ekonómiko finansiero pa mehorá e posishon kompetitivo di e union monetario, i tambe fortalesé finansa públiko di ámbos pais na un forma duradero”, segun dr. Jardim.