‘Ainda no tin un bon bista di embergadura i durashon di e krísis’
Centrale Bank van Curaçao en Sint Maarten (CBCS) ta stimulá e institutonan finansiero pa krea mas espasio pa wanta e impakto ku e pandemia di COVID-19 tin riba sektor finansiero.
E konsekuensianan di e pandemia di COVID-19 riba komunidat i ekonomia ta konsiderabel. Pa protehá salú públiko, inevitablemente mester a tuma medida drástiko pa evitá ku e vírùs lo a sigui plama. ‘Ya ku no por bisa di antemano kon lihé e situashon lo normalisá, ta importante pa (komo prekoushon) e institutonan finansiero tuma medida èkstra pa krea mas reserva, esta, mas espasio pa absorbá e impakto negativo di e krísis aktual’, segun Presidente Interino di CBCS, dr. José Jardim. Vários instituto a tuma inisiativa pa hasi esei kaba. Un manera rápido i efektivo pa logra esakí ta di keda sin paga dividendo i añadi e ganashi na e reservanan di e instituto.
Pago di dividendo ta rekerí aprobashon prévio di Banko Sentral. Banko Sentral a urgí e institutonan finansiero pa nan tuma e pasonan nesesario i suspendé pago di dividendo te ora bin mas klaridat relashoná ku e krísis aktual. Den e di dos kuartal di e aña akí, Banko sentral lo hasi diferente ‘stress test’ serka tur banko, kompania di seguro i fondo di penshun pa haña un mihó bista di e impakto ku e krísis akí tin riba e institutonan finansiero en kuestion. Entre otro a base di resultado di e tèstnan akí, lo disidí si mester tuma medida adishonal i te kon leu por permití pago di dividendo.
Banko ke reeiterá su kompromiso pa salvaguardá nos stabilidat finansiero i monetario. ‘E medidanan akí lo yuda e institutonan finansiero bira mas resistente i yuda sektor finansiero bira mas saludabel pa enfrentá e tempu di krísis akí’, segun e Presidente Interino dr. Jardim.