Aruba, Kòrsou i Colombia a sera nan espasio aéreo pa transporte di pasahero for di islanan di Hulanda Karibense debí na e krísis kresiente rondó di vírùs di corona.
Esaki ta nifiká ku aktualmente no ta atmití pasaheronan for di Boneiru, Sint Eustatius i Saba na Aruba, Kòrsou i Colombia, si nan no ta habitante di e pais. P’esei ta suspendé trasladonan médiko elektivo (tratamentunan médiko ku no ta di emergensia), te ku próksimo aviso. Pa situashonnan di emergensia médiko agudo for di Boneiru, Sint Eustatius òf Saba si por bai Kòrsou, Aruba i Sint Maarten ainda. Tratamentunan di onkologia i diálisis ta kontinuá komo tratamentu agudo na Kòrsou, Aruba i Sint Maarten.vvAsina por ehekutá tratamentunan médiko elektivo atrobe, aseguradonan ku ta wardando riba un traslado médiko lo risibí notifikashon di esaki via di nan dòkter di referensia. Mirando e preshon haltu riba nos instansianan médiko, nos ta pidi aseguradonan pa yama klínikanan solamente den kaso di emergensia.
Ofisina di Seguro di Kuido BES (ZVK) i Fundashon Mariadal (FM) ta den estrecho deliberashon ku Ministerio di Salubridat, Bienestar i Deporte (VWS) pa buska solushon. Nos ta spera boso komprenshon i koperashon den e situashon aki.
