WILLEMSTAD,- Awe mainta tabata tin un reunion entre miembronan di Kolegio di Supervishon Finansiero (Cft) di Kòrsou i Sint Maarten ku miembronan di Konseho Ekonómiko i Sosial (SER) di Kòrsou. Durante e reunion tabata presente miembronan di Cft i miembronan di SER, ámbos kompañá pa nan respektivo Sekretariadonan.
Bou di e temanan ku a bini dilanti, a figurá e situashon finansiero di Kòrsou, e ekonomia ku ta stanká pa 25 aña kaba i e kontrakshon ekonómiko ku pais ta konfrontando e último 5 añanan. Tambe a papia riba e défisitnan presupuestario persistente i e debe kresiente ku ta forma un riesgo pa ku presupuesto 2020 i e défisitnan premirá a plaso largu relatá na gastunan di mantenshon di un sistema adekuá di salú públiko i mantenshon di un sistema de seguridat sosial.
Tambe a elaborá riba e oportunidatnan pa kambia e situashon, pa evitá ku e défisitnan ta yega na nivelnan ku no por manehá nan mas. Ámbos organismo, esta Cft i SER, ta wak desafionan grandi den garantisá sustenibilidat di e sistema di seguridat sosial. En kuantu e reformanan fiskal a trese pa dilanti ku e legislashon fiskal ku gobièrnu presentá mester ta unu kla den e sentido ku su aplikashon mester garantisá un ambiente empresarial saludabel.
Mas aleu a suprayá e nesesidat di kooperashon i konsenso entre e interlokutornan sosial i gobièrnu i e nesesidat pa krea aseptashon amplio den komunidat pa e akshonnan nesesario pa bòltu e timon. Ademas a papia riba funshon di SER i e asesoramentu di SER i otro órganonan superior di estado.
Na final di e reunion partidonan a enfatisá e importansia pa Cft i SER konsultá ku otro periódikamente riba desaroyonan, kada unu for di nan tareanan legal.
