Riba 30 di ougùstùs 2018 ta publiká e promé komparashon di preis Boneiru. Ku e komparashon di preis akí konsumidónan na Boneiru por mira fásilmente kua montante nan mester paga den kua supermerkado pa un makutu standart di 60 diferente produkto. E makutu ta konsistí di artíkulonan ku ta kumpra diariamente manera bèrdura, karni, pan. Pero e ta kontené tambe habon di laba paña, shampu i papel di wc.
Stimulá konsiensia enkuanto preis
Unkobon, den kooperashon ku Fundashon Tienda pa Konsumidó (FTpKB), ta ehekutá e proyekto di komparashon di preis riba enkargo di ministerio di Asuntunan Ekonómiko i Klima.
Meta di e proyekto ta pa krea konsiensia enkuanto preis serka e habitantenan di Boneiru. Kada luna ta publiká e komparashon di preis den un par di korant i riba www.unkobon.org.
Tambe a traves di otro kanalnan, manera Facebook i radio ta komuniká enkuanto e komparashon di preis, pa alkansá un públiko mas ámplio posibel.
Opservashonnan di preis
A kompilá un lista di produkto (makutu di kompra) di 60 produkto, ku un kas di famia promedio tin mester regularmente. Pa loke ta trata e komparashon di preis ta bai pa e variante di mas barata pa supermerkado di e 60 produktonan spesífiko akí.
Opservadónan di e proyekto di komparashon di preis ta sali tur luna i ta bishitá 15 supermerkado. E tiendanan akí ta duna un bista representativo i ta plamá riba e diferente barionan na Boneiru. E 15 supermerkadonan a primintí ku nan lo kooperá. Tur e opservadónan tin eksperensia riba tereno di opservashon di preis. Dos pareu ta bishitá dos bes tur e tiendanan ku ta partisipá, e di dos bia ta pa por kontrolá bon si no a kometé ningun eror. Nan ta hasi nan trabou profeshonal i transparente.
Hasi eskoho konsiente
E komparashonnan di preis no ta kontrol di preis. Ta nota solamente kiko preis di e produkto ta i ta prosesá e preisnan akí den un resúmen. Ta publiká e resúmen akí mensualmente i a base di e komparashon di preis akí e konsumidónan mes, bon informá –i mas konsiente-, por skohe unda nan ta bai hasi nan kompranan.